खेड:
लोटे (ता. खेड) येथील कंसाई नेरोलॅक पेंटस लिमिटेड कंपनीच्या बाहेरील गेटसमोरील पार्किंगमधून एक दुचाकी चोरीला गेल्याची घटना समोर आली आहे. याप्रकरणी खेड पोलीस ठाण्यात अज्ञात संशयित आरोपीविरोधात चोरीचा गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, फिर्यादी करण रवींद्र देवांग (वय २१, रा. मु.पो. ओमळी गोंधळेवाडी, ता. चिपळूण) यांनी आपली काळ्या रंगाची होंडा कंपनीची युनिकॉर्न दुचाकी (क्र. एम.एच. ०५ सी.डी. ४९९९) ७ जुलै २०२६ रोजी दुपारी १२.३० ते रात्री ८.०० वाजण्याच्या सुमारास कंपनीच्या बाहेरील पार्किंगमध्ये लावली होती. या दरम्यान, कोणत्याही अज्ञात व्यक्तीने फिर्यादीच्या संमतीशिवाय ती गाडी लबाडीच्या इराद्याने चोरून नेली. चोरीला गेलेल्या या दुचाकीची किंमत सुमारे ३५,००० रुपये आहे.
आपली दुचाकी चोरीला गेल्याचे लक्षात आल्यानंतर फिर्यादीने खेड पोलीस ठाण्यात धाव घेतली. पोलिसांनी ९ जुलै २०२६ रोजी सायंकाळी ५.०३ वाजता या प्रकरणी गुन्हा दाखल केला आहे. खेड पोलीस या घटनेचा अधिक तपास करत असून अज्ञात संशयित आरोपीचा शोध घेतला जात आहे.
