मुंबईतील कांदिवली परिसरात अल्पवयीन विद्यार्थिनीच्या हत्येने खळबळ उडाली आहे. या प्रकरणातील आरोपीला पोलिसांनी अवघ्या काही तासांत अटक केली असून त्याने गुन्ह्याची कबुली दिल्याची माहिती समोर आली आहे. प्राथमिक तपासात संशय आणि एकतर्फी प्रेमातून हा प्रकार घडल्याचा संशय व्यक्त करण्यात येत आहे. आरोपी डिलिव्हरी बॉय म्हणून काम करत असल्याची माहिती पोलिसांनी दिली आहे. या घटनेचा अधिक तपास कांदिवली पोलीस करत आहेत.
संशयातून हत्येचा प्रकार घडल्याचा प्राथमिक तपास
मुंबई : कांदिवली परिसरात घडलेल्या अल्पवयीन विद्यार्थिनीच्या हत्येप्रकरणी पोलिसांनी आरोपीला काही तासांतच अटक केली. पोलिसांनी दिलेल्या माहितीनुसार, सूरज वाघमारे याला संबंधित विद्यार्थिनीबाबत संशय होता. तिच्या मोबाईलमधील अनेक संपर्क क्रमांक हटवणे तसेच इतरांना ब्लॉक करण्यासाठी तो दबाव टाकत असल्याची माहिती तपासात समोर आली आहे. विद्यार्थिनी इतरांशी संवाद साधत असल्याच्या संशयातून आरोपीने टोकाचे पाऊल उचलल्याचा प्राथमिक अंदाज व्यक्त करण्यात येत आहे.
तपासादरम्यान आरोपीने यापूर्वीही विद्यार्थिनीवर मानसिक दबाव टाकल्याची माहिती समोर आली आहे. तसेच आत्महत्येचे नाटक करून तिला त्रास देत असल्याचेही तपासात उघड झाले आहे. रागाच्या भरात आरोपीने विद्यार्थिनीवर चाकूने वार करून तिची हत्या केल्याचा आरोप असून या निर्घृण घटनेमुळे संपूर्ण कांदिवली परिसरात हळहळ व्यक्त होत आहे.
चेहऱ्यावर वार करून हत्या; पोलिसांचा तपास सुरू
ही घटना कांदिवली पूर्व येथील दामूनगर परिसरात घडली. आरोपीने विद्यार्थिनीच्या चेहऱ्यावर वारंवार चाकूने हल्ला केल्याचे तपासात समोर आले आहे. शवविच्छेदन अहवालानुसार तिच्या चेहऱ्यावर 16 हून अधिक वार करण्यात आल्याची माहिती मिळाली आहे. घटनास्थळावरील तांत्रिक पुरावे आणि इतर माहितीच्या आधारे पोलिसांनी आरोपीला ताब्यात घेतले.
सूरज वाघमारे (वय 22) हा कांदिवलीतील दामूनगर परिसरातील सरस्वती चाळीचा रहिवासी असून तो डिलिव्हरी बॉय म्हणून काम करत असल्याची माहिती समोर आली आहे. विद्यार्थिनीवर प्रेमसंबंध ठेवण्यासाठी दबाव टाकणे, तिला मानसिक त्रास देणे आणि वारंवार धमकावणे, अशा बाबींचाही तपास सुरू आहे. या प्रकरणाचा अधिक तपास कांदिवली पोलीस करत असून सर्व पैलूंची सखोल चौकशी सुरू आहे.
