आईसाहेब फाउंडेशनच्या उपक्रमातून जीवनावश्यक साहित्याचे वाटप; “समाज मोठा इमारतींनी नव्हे, तर माणसांच्या आधाराने उभा राहतो” याची प्रचिती
पन्हाळा प्रतिनिधी
प्रतापसिंह काळे
वृद्धत्व हे आयुष्याचं अपरिहार्य सत्य… दिव्यांगत्व ही नियतीची परीक्षा… पण या दोन्ही अवस्थांना जर माणुसकीचा हात मिळाला, तर जगणं पुन्हा उभारी घेतं. वाघवे येथे रविवारी घडलेलं दृश्य हे केवळ साहित्य वाटपाचं नव्हतं; ते असहाय्य डोळ्यांत पुन्हा जगण्याची उमेद जागवणाऱ्या संवेदनशील समाजाचं प्रतिबिंब होतं.आईसाहेब फाउंडेशनच्या वतीने प्रधानमंत्री दिव्याशा केंद्र आणि राष्ट्रीय वयोश्री योजना अंतर्गत आयोजित कार्यक्रमात आमदार विनय कोरे यांच्या हस्ते २०० हून अधिक दिव्यांग आणि ज्येष्ठ नागरिकांना व्हीलचेअर, टॉयलेट खुर्च्या, कमरेचे व मानेचे पट्टे, तसेच तीन व चार पायांच्या काठ्यांसह विविध जीवनावश्यक साहित्याचे वितरण करण्यात आले.
या साहित्याची किंमत पैशांत मोजता येणार नाही. कारण ते केवळ साधन नाही, तर एका वृद्धाच्या पावलांना आधार देणारं बळ आहे; एका दिव्यांगाच्या स्वाभिमानाला पुन्हा उभं करणारा विश्वास आहे. समाजात अजूनही माणुसकी जिवंत असल्याचा हा जिवंत पुरावा ठरला.यावेळी बोलताना आमदार विनय कोरे यांनी आईसाहेब फाउंडेशनच्या समाजाभिमुख कार्याचे मनापासून कौतुक केले. “गरजूंच्या आयुष्यात आधाराची सावली निर्माण करणारे असे उपक्रम समाज अधिक संवेदनशील बनवतात,” असे सांगत त्यांनी फाउंडेशनचे अध्यक्ष महादेव पाटील यांच्या सेवाभावी कार्याचा विशेष गौरव केला.कार्यक्रमास निर्माण सेवाभावी संस्थेचे जयदीप पाटील, पंचायत समिती सदस्या शोभा पाटील, सरपंच राजश्री उदाळे, दादासाहेब तावडे, राहुल मोरे, स्वाती पाटील, आईसाहेब फाउंडेशनचे पदाधिकारी, शिवप्रेमी आणि ग्रामस्थ मोठ्या संख्येने उपस्थित होते.समाजात अनेकदा विकासाची व्याख्या रस्ते, पूल आणि इमारतींमध्ये शोधली जाते. पण खरा विकास तेव्हाच घडतो, जेव्हा थकलेल्या हाताला आधार मिळतो, अडखळणाऱ्या पावलांना काठी मिळते आणि निराश चेहऱ्यावर पुन्हा हसू फुलतं. वाघवेतील हा उपक्रम त्या माणुसकीच्या विकासाचा जिवंत दस्तऐवज ठरला.
