रत्नागिरी:
रत्नागिरीतील नाचणे येथील श्री स्वामी समर्थ सेवा केंद्र (दिंडोरी प्रणित) येथे आज गुरुपौर्णिमा अत्यंत भक्तिमय वातावरणात आणि मोठ्या उत्साहात साजरी केली जात आहे. गुरुपौर्णिमेचे औचित्य साधून सकाळपासूनच सेवा केंद्रात स्वामी भक्तांची दर्शनासाठी मोठी गर्दी पाहायला मिळत आहे.
दिवसाची सुरुवात स्वामींच्या मंगलमय आणि मंत्रमुग्ध करणाऱ्या महाआरतीने अत्यंत उत्साहात झाली. याप्रसंगी संपूर्ण परिसर स्वामींच्या नामाघोषाने दुमदुमून गेला होता. गुरुपौर्णिमेनिमित्त सेवा केंद्राच्या वतीने विविध सामाजिक व धार्मिक उपक्रम राबवले जात आहेत.
या उपक्रमांचाच एक भाग म्हणून आज केंद्रात आरोग्य शिबिराचे आयोजन करण्यात आले असून नागरिकांचा त्याला उत्तम प्रतिसाद मिळत आहे. दिवसभरात भाविकांसाठी धार्मिक कार्यक्रम, महाप्रसाद आणि इतर विविध सामाजिक उपक्रम पार पडणार आहेत. स्वामींच्या दर्शनासाठी परिसरातून हजारो भक्तगण सेवा केंद्रात दाखल होत असून अतिशय शिस्तबद्ध वातावरणात दर्शन सोहळा सुरू आहे.
