वीज वितरण व्यवस्था बळकट करण्यासाठीही प्रयत्न : आमदार दीपक केसरकर
सावंतवाडी :
कोकण रेल्वेच्या सावंतवाडी टर्मिनससह मळगाव, न्हावेली आणि निरवडे या तीन महत्त्वाच्या गावांच्या परिसरासाठी ‘नाबार्ड’च्या (NABARD) माध्यमातून नवीन पाणीपुरवठा योजना प्रस्तावित करण्यात आली आहे. राज्याचे पाणीपुरवठा मंत्री गुलाबराव पाटील यांनी या योजनेबाबतचे आवश्यक आदेश जारी केले असल्याची माहिती सावंतवाडीचे आमदार दीपक केसरकर यांनी दिली. या पत्रकार परिषदेला शिवसेना जिल्हाप्रमुख संजू परब यांचीही प्रमुख उपस्थिती होती.
विधानसभा मतदारसंघातील मूलभूत सुविधांवर भाष्य करताना आमदार केसरकर म्हणाले की, मतदारसंघातील पाणी आणि वीज पुरवठा सुरळीत व अखंडित ठेवण्यासाठी सातत्याने विशेष प्रयत्न केले जात आहेत. वीज यंत्रणा अधिक सक्षम करण्यासाठी इन्सुली ते आडाळी एमआयडीसीदरम्यान अत्यंत महत्त्वाची वीज वाहिनी टाकण्याचे काम हाती घेण्यात आले आहे. यामुळे दोडामार्ग तालुका तसेच आडाळी एमआयडीसी परिसरातील वीज वितरण व्यवस्था अधिक बळकट होणार आहे.
आडाळी एमआयडीसीच्या विस्ताराबाबत माहिती देताना त्यांनी सांगितले की, या ठिकाणी लवकरच ४९ नवे उद्योग उभारले जाणार आहेत. त्यामुळे या परिसराची वाढती विजेची गरज लक्षात घेता वीज वितरण कंपनीकडून नवीन वाहिन्या टाकण्याचे काम अत्यंत वेगाने सुरू आहे.
या विकासकामांमध्ये कोणत्याही प्रकारची अडचण किंवा स्थानिकांचा विरोध आल्यास, त्यांच्याशी संवाद साधून सकारात्मक मार्ग काढला जाईल. मात्र, कामातील विनाकारण होणारा अडथळा खपवून घेतला जाणार नाही आणि गरज भासल्यास पोलीस बंदोबस्तात हे काम पूर्ण केले जाईल, असा स्पष्ट इशाराही आमदार दीपक केसरकर यांनी या वेळी दिला.
