रत्नागिरी : जी. एम. शेट्ये हायस्कूल, बसणी येथे ‘आनंददायी शनिवार’ या उपक्रमांतर्गत विद्यार्थ्यांसाठी राखी तयार करणे हा सर्जनशील व आनंददायी उपक्रम उत्साहात घेण्यात आला.
रक्षाबंधनाच्या निमित्ताने विद्यार्थ्यांमध्ये भाऊ-बहिणीच्या प्रेमाची भावना, बंधुभाव, सर्जनशीलता, कलाकौशल्य आणि स्वावलंबन निर्माण व्हावे, या उद्देशाने या उपक्रमाचे आयोजन करण्यात आले. विद्यार्थ्यांनी स्वतःच्या कल्पकतेने विविध रंगांचे मणी, मोती, लाल रंगाचे दोरे व इतर सजावटीचे साहित्य वापरून आकर्षक राख्या तयार केल्या.
उपक्रमादरम्यान विद्यार्थ्यांनी अतिशय उत्साहाने सहभाग घेतला. काही विद्यार्थ्यांनी मण्यांची निवड व मांडणी केली, तर काहींनी दोऱ्यांमध्ये मणी गुंफून सुंदर राख्या तयार केल्या. मणी आणि दोऱ्यापासून साध्या, कमी खर्चातील तसेच आकर्षक राख्या तयार करण्याचा अनुभव विद्यार्थ्यांना मिळाला. स्वतःच्या हाताने तयार केलेली राखी हातात धरताना विद्यार्थ्यांच्या चेहऱ्यावर आनंद आणि समाधान दिसून येत होते.
या उपक्रमातून विद्यार्थ्यांना ‘स्वतः करा व स्वतः शिका’ या संकल्पनेचा अनुभव मिळाला. तसेच उपलब्ध साधनसामग्रीचा योग्य वापर करून सुंदर वस्तू निर्माण करता येतात, याची जाणीव विद्यार्थ्यांना झाली. विद्यार्थ्यांनी एकमेकांना मदत करत राख्या तयार केल्यामुळे सहकार्य, संयम, एकाग्रता आणि समूहभावना यांसारख्या मूल्यांचाही विकास झाला.
शाळेतील शिक्षकांनी विद्यार्थ्यांना राखी तयार करण्यासाठी आवश्यक मार्गदर्शन केले. विद्यार्थ्यांनी तयार केलेल्या विविध रंगीबेरंगी राख्यांमुळे शाळेतील वातावरण आनंदमय झाले. ‘आनंददायी शनिवार’ या उपक्रमामागील आनंद, कृतीतून शिक्षण आणि विद्यार्थ्यांच्या कलागुणांना वाव देण्याचा उद्देश या उपक्रमातून सफल झाला.
या उपक्रमाच्या यशस्वी आयोजनासाठी शाळेच्या मुख्याध्यापिका श्रीम. भातडे मॅडम, शिक्षकवृंद व विद्यार्थ्यांनी विशेष परिश्रम घेतले. विद्यार्थ्यांच्या उत्स्फूर्त सहभागामुळे राखी तयार करण्याचा हा उपक्रम संस्मरणीय ठरला.
