सिंधुदुर्गातील कणकवली, सिंधुदुर्ग, सावंतवाडी रोडसह रत्नागिरीतील अनेक स्थानकांवर थांबा; चिपळूण–पनवेलदरम्यानही अनारक्षित मेमू विशेष
कोकण : गणपती उत्सवाच्या पार्श्वभूमीवर प्रवाशांची वाढती गर्दी लक्षात घेऊन कोकण रेल्वेने अतिरिक्त विशेष गाड्या चालविण्याचा निर्णय घेतला आहे. यामध्ये मडगाव जंक्शन–लोकमान्य टिळक टर्मिनस–मडगाव जंक्शन विशेष एक्स्प्रेस आणि चिपळूण–पनवेल–चिपळूण अनारक्षित मेमू विशेष या दोन गाड्यांचा समावेश आहे.
मडगाव–मुंबई विशेष एक्स्प्रेस
01004 मडगाव जंक्शन–लोकमान्य टिळक टर्मिनस विशेष गाडी 15 आणि 18 सप्टेंबर 2026 रोजी सायंकाळी 4 वाजता मडगाव जंक्शनहून सुटेल. ही गाडी दुसऱ्या दिवशी सकाळी 6.05 वाजता लोकमान्य टिळक टर्मिनसला पोहोचेल.
परतीच्या प्रवासात 01003 लोकमान्य टिळक टर्मिनस–मडगाव जंक्शन विशेष गाडी 16 आणि 19 सप्टेंबर रोजी सकाळी 7.50 वाजता लोकमान्य टिळक टर्मिनसहून सुटून त्याच दिवशी रात्री 11.45 वाजता मडगाव जंक्शनला पोहोचणार आहे.
या गाडीला कोकणातील कर्माळी, थिविम, सावंतवाडी रोड, कुडाळ, सिंधुदुर्ग, कणकवली, नांदगाव रोड, वैभववाडी रोड, राजापूर रोड, विलवडे, आडवली, रत्नागिरी, संगमेश्वर रोड, सावर्डा, चिपळूण, खेड, वीर, माणगाव, रोहा, पेण, पनवेल आणि ठाणे या स्थानकांवर थांबे देण्यात आले आहेत.
या विशेष एक्स्प्रेसला एकूण 19 डबे असतील. त्यामध्ये 3 एसी थ्री-टियर, 8 स्लीपर, 6 जनरल आणि 2 एसएलआर/डी डबे असतील.
चिपळूण–पनवेल अनारक्षित मेमू विशेष
गणपती उत्सवाच्या काळात कोकणातून मुंबईकडे आणि मुंबईहून कोकणात ये-जा करणाऱ्या प्रवाशांसाठी 01160 चिपळूण–पनवेल अनारक्षित मेमू विशेष गाडीही चालविण्यात येणार आहे.
ही गाडी 10 ते 14 सप्टेंबर तसेच 18 ते 27 सप्टेंबर 2026 या कालावधीत दररोज सकाळी 9 वाजता चिपळूणहून सुटेल आणि त्याच दिवशी दुपारी 2.30 वाजता पनवेलला पोहोचेल.
परतीच्या प्रवासात 01159 पनवेल–चिपळूण अनारक्षित मेमू विशेष याच कालावधीत दररोज दुपारी 3.20 वाजता पनवेलहून सुटून रात्री 10.20 वाजता चिपळूणला पोहोचणार आहे.
या मेमूला अंजनी, खेड, कळंबणी बुद्रुक, दिवाणखवटी, विन्हेरे, करंजाडी, सापे वामणे, वीर, गोरेगाव रोड, माणगाव, इंदापूर, कोलाड, रोहा आणि पेण या स्थानकांवर थांबे देण्यात आले आहेत. या गाडीला एकूण 8 मेमू डबे असतील.
01004 या विशेष एक्स्प्रेसचे आरक्षण 8 सप्टेंबर 2026 पासून सर्व प्रवासी आरक्षण प्रणाली (PRS), इंटरनेट तसेच IRCTC संकेतस्थळावर सुरू होणार आहे. गणपती उत्सवासाठी प्रवास करणाऱ्या प्रवाशांनी या अतिरिक्त विशेष रेल्वे सेवेचा लाभ घ्यावा, असे आवाहन कोकण रेल्वे प्रशासनाने केले आहे.
