चिमुकल्यांच्या सुरस कथांनी रंगले ज्ञानदीप विद्यासंकुल; विद्यार्थ्यांचा उत्स्फूर्त सहभाग
खेड (प्रतिनिधी) : महात्मा गांधी व भारताचे माजी पंतप्रधान लालबहादूर शास्त्री यांच्या जयंतीनिमित्त ज्ञानदीप शिक्षण प्रसारक मंडळ, खेड (रत्नागिरी) संचालित ज्ञानदीप विद्यासंकुल, भडगाव येथे विद्यार्थ्यांसाठी कथाकथन स्पर्धेचे उत्साहपूर्ण आयोजन करण्यात आले. विद्यार्थ्यांच्या कल्पनाशक्तीला, वक्तृत्वकौशल्याला आणि सादरीकरणाच्या क्षमतेला वाव देणाऱ्या या स्पर्धेला विद्यार्थ्यांचा उत्स्फूर्त प्रतिसाद मिळाला.
प्रशालेतील नर्सरी ते इयत्ता पाचवीपर्यंतच्या विद्यार्थ्यांसाठी विविध गटांमध्ये ही कथाकथन स्पर्धा घेण्यात आली. विद्यार्थ्यांनी विनोदी, बोधप्रद, मनोरंजक तसेच प्रसंगी गंभीर आणि विचार करायला लावणाऱ्या कथा प्रभावी हावभाव, आवाजातील चढ-उतार आणि आत्मविश्वासपूर्ण सादरीकरणातून उपस्थितांसमोर मांडल्या. चिमुकल्या विद्यार्थ्यांच्या निरागस अभिनयाने आणि त्यांच्या ओघवत्या कथाकथनाने वातावरणात उत्साह निर्माण झाला.
नर्सरी गटातील स्पर्धेत वल्लभ श्रीकांत पणदेरे याने प्रथम, ओजस विनोद टेंबे याने द्वितीय, तर श्रीश महेंद्र मोरे याने तृतीय क्रमांक पटकावला. लहान गटात हिंदवी अमित लाड हिने प्रथम, शिवराज प्रमोद निवळकर याने द्वितीय, तर श्रीनय सुशांत निर्मळ याने तृतीय क्रमांक मिळवला. मोठ्या गटात आराध्य संदेश जाधव याने प्रथम, कनिका सुदेश आयरे हिने द्वितीय, तर स्वरांश राहुल तुगावकर याने तृतीय क्रमांक मिळवला.
इयत्ता पहिलीच्या स्वतंत्र गटातील स्पर्धेत काव्या काशिराम शिंदे हिने प्रथम, तर गार्गी अभिजित शिंदे हिने द्वितीय क्रमांक मिळवला. इयत्ता दुसरी व तिसरीच्या गटात अन्वी राजेश क्षीरसागर हिने प्रथम, ओवी मोहन दहिफळे हिने द्वितीय, तर स्वानंदी प्रमोद निवळकर व अनुष्क कांतिनाथ शिंदे यांनी विभागून तृतीय क्रमांक पटकावला.
इयत्ता चौथी व पाचवीच्या गटात अथर्व अविनाश जंगम याने प्रथम, अजिंक्य राजाराम घुले याने द्वितीय, तर मनस्वी संतोष दामले व अवनी सुदेश आयरे यांनी विभागून तृतीय क्रमांक मिळवला.
कथाकथनाच्या माध्यमातून विद्यार्थ्यांना केवळ मनोरंजनच नव्हे, तर नैतिक मूल्ये, सामाजिक जाणीव, देशप्रेम, प्रामाणिकपणा, धैर्य आणि सकारात्मक विचार यांची ओळख करून देण्याचा या उपक्रमाचा उद्देश होता. विद्यार्थ्यांनी सादर केलेल्या विविध कथांमधून त्यांच्या वाचनाची आवड, भाषिक कौशल्य, स्मरणशक्ती आणि सादरीकरणातील आत्मविश्वास प्रकर्षाने दिसून आला.
स्पर्धेच्या यशस्वी आयोजनासाठी स्पर्धाप्रमुख सचिन बेर्डे, विजय शिंदे, योगेश चिले, प्रज्ञा मोरे, अंजली जाधव, राजेंद्र नाटेकर, रुपाली भिसे, सुनयना सावंत, राधा भालेकर, अश्विनी दांडेकर आणि स्नेहा सुर्वे यांचे मोलाचे सहकार्य लाभले.
स्पर्धेत यश संपादन करणाऱ्या तसेच सहभागी झालेल्या सर्व विद्यार्थ्यांचे संस्थेचे अध्यक्ष अरविंद तोडकरी, उपाध्यक्ष डॉ. रमणलाल तलाठी, सरचिटणीस माधव पेठे, खजिनदार विनोद बेंडखळे, विश्वस्त पेराज जोयसर, जनसंपर्क अधिकारी दीपक लढ्ढा, संस्थापक सरचिटणीस प्रकाश गुजराती, संस्थापक सदस्य भालचंद्र कांबळे, चंदन पाटणे, प्रफुल्ल महाजन, अनिल शिवदे, रुपल पाटणे तसेच सल्लागार मंडळ सदस्य, प्राथमिक व पूर्व प्राथमिक विभागाच्या मुख्याध्यापिका सौ. पूर्वा मोरे, प्रशालेचे प्राचार्य राजकुमार मगदूम आणि सर्व शिक्षक व शिक्षकेतर कर्मचाऱ्यांनी अभिनंदन केले.
विद्यार्थ्यांच्या सुप्त कलागुणांना व्यासपीठ उपलब्ध करून देणाऱ्या या कथाकथन स्पर्धेमुळे ज्ञानदीप विद्यासंकुलातील शैक्षणिक वातावरणात उत्साहाचे वातावरण निर्माण झाले. विद्यार्थ्यांच्या कल्पकतेला आणि अभिव्यक्तीला चालना देणाऱ्या अशा उपक्रमांचे सातत्याने आयोजन करण्याचा संस्थेचा प्रयत्न असल्याचे यावेळी अधोरेखित झाले.
