खेड (प्रतिनिधी) : एकात्मिक बाल विकास सेवा योजना प्रकल्प, खेड अंतर्गत बीट आंबवलीच्या वतीने किंजळे तर्फे खेड येथे दि. ३ ऑक्टोबर २०२६ रोजी ‘९ वा राष्ट्रीय पोषण महा अभियान’ व ‘सेवा संकल्प अभियान’ उत्साहपूर्ण वातावरणात आयोजित करण्यात आले. महिला व बालकांचे आरोग्य, पोषण, शिक्षण तसेच शासनाच्या विविध कल्याणकारी योजनांची माहिती सर्वसामान्य नागरिकांपर्यंत पोहोचविण्याच्या उद्देशाने या कार्यक्रमाचे आयोजन करण्यात आले होते.
कार्यक्रमादरम्यान महिला व बाल विकास विभागामार्फत राबविण्यात येणाऱ्या विविध कल्याणकारी योजनांची सविस्तर माहिती पर्यवेक्षिका सौ. प्रिती पवार यांनी उपस्थित महिला, पालक व लाभार्थींना दिली. यामध्ये मुख्यमंत्री माझी लाडकी बहीण योजना, प्रधानमंत्री मातृ वंदना योजना, बेबी केअर किट वाटप यांसह महिला व बालकांच्या कल्याणासाठी शासनाकडून राबविण्यात येणाऱ्या विविध योजनांची माहिती देण्यात आली. पात्र लाभार्थींनी शासनाच्या योजनांचा लाभ घेण्यासाठी आवश्यक कागदपत्रे व प्रक्रियेची माहितीही यावेळी देण्यात आली.
प्रधानमंत्री मातृ वंदना योजनेचा लाभ मिळालेल्या लाभार्थीचा यावेळी विशेष सत्कार करण्यात आला. मातृत्वाच्या काळात महिलांना आर्थिक व आरोग्यविषयक आधार मिळावा, तसेच माता व बालकांच्या आरोग्याची योग्य काळजी घेतली जावी, यासाठी शासनाच्या योजनांचा प्रभावी वापर करण्याचे आवाहन उपस्थितांना करण्यात आले.
कार्यक्रमात पोषण व संतुलित आहाराचे महत्त्व यावर मार्गदर्शन करण्यात आले. महिला व बालकांच्या शारीरिक व मानसिक विकासासाठी दैनंदिन आहारात आवश्यक पोषक घटकांचा समावेश कसा करावा, स्थानिक पातळीवर उपलब्ध असलेल्या पौष्टिक पदार्थांचा उपयोग करून संतुलित आहार कसा तयार करता येईल, याबाबत उपस्थितांना माहिती देण्यात आली. कुपोषण निर्मूलनासाठी कुटुंब व समाजाची भूमिका महत्त्वाची असल्याचेही यावेळी सांगण्यात आले.
पोषण विषयक जनजागृतीसाठी रांगोळी प्रदर्शन व पाककृती प्रदर्शनाचे आयोजन करण्यात आले होते. विविध पौष्टिक पदार्थांच्या पाककृती, त्यांचे आरोग्यविषयक फायदे आणि बालकांच्या आहारातील त्यांचे महत्त्व यांचे प्रात्यक्षिक प्रदर्शनातून मांडण्यात आले. रांगोळीच्या माध्यमातूनही पोषण, आरोग्य आणि स्वच्छतेचा संदेश देण्यात आला. या प्रदर्शनाला उपस्थित महिला, पालक, विद्यार्थी व ग्रामस्थांनी उत्स्फूर्त प्रतिसाद दिला.
यावेळी ई-आकारच्या श्रीमती साक्षी भांगे मॅडम यांनी ‘आकार उपक्रम’, ‘नवचेतना उपक्रम’ तसेच विविध ऑनलाईन उपक्रमांची माहिती भरण्याची प्रक्रिया याबाबत मार्गदर्शन केले. अंगणवाडी केंद्रांमार्फत राबविण्यात येणाऱ्या उपक्रमांची ऑनलाइन नोंद, माहिती संकलन आणि त्याचे महत्त्व याबाबतही त्यांनी उपस्थितांना माहिती दिली.
कार्यक्रमाला किंजळे ग्रामपंचायतीचे उपसरपंच मा. श्री. ऋषिकेश मोरे, ग्रामपंचायत सदस्य मा. सौ. श्रुतिका चव्हाण, माजी जिल्हा परिषद सदस्य मा. सौ. दर्शना मोरे, माजी आर्मी सैनिक श्री. चंद्रकांत पवार, किंजळे हायस्कूलचे मुख्याध्यापक श्री. धूम सर, शिक्षक श्री. मुजावर सर, आरोग्य सेविका शुभांगी वणे, आरोग्य सेवक श्री. दीपक मोहिते, तसेच शिपाई दगडू जाधव व संतोष मोरे यांच्यासह गावातील महिला, अंगणवाडी सेविका व मदतनीस, हायस्कूलचे विद्यार्थी आणि अंगणवाडी लाभार्थी मोठ्या संख्येने उपस्थित होते.
महिला व बालकांच्या आरोग्याबाबत जागरूकता निर्माण करण्यासोबतच शासनाच्या विविध योजनांचा लाभ पात्र लाभार्थींपर्यंत पोहोचविण्यासाठी अशा जनजागृतीपर उपक्रमांची आवश्यकता असल्याचे उपस्थित मान्यवरांनी सांगितले. ग्रामस्थ, महिला आणि विद्यार्थ्यांचा उत्स्फूर्त सहभाग हे या कार्यक्रमाचे विशेष आकर्षण ठरले.
कार्यक्रमाचे सूत्रसंचालन अंगणवाडी सेविका सौ. माधवी यादव यांनी केले. महिला व बाल विकास विभागाच्या विविध योजनांची माहिती, पोषणविषयक मार्गदर्शन, प्रदर्शन आणि जनजागृती उपक्रमांमुळे किंजळे परिसरात पोषण, आरोग्य आणि शासकीय योजनांविषयी जनजागृती करण्यासाठी या अभियानाला महत्त्वपूर्ण स्वरूप प्राप्त झाले.
