७ लाख ९८ हजारांचा ऐवज लंपास; अवघ्या तासाभरात चोरट्यांचा पोबारा
खेड (प्रतिनिधी) : खेड तालुक्यातील भरणे-बाईतवाडी परिसरातील आदित्य रेसिडेन्सीमध्ये दिवसाढवळ्या दोन बंद सदनिकांचे कुलूप तोडून अज्ञात चोरट्यांनी सुमारे ७ लाख ९८ हजार रुपयांचे सोन्या-चांदीचे दागिने आणि रोख रक्कम लंपास केल्याची धाडसी घटना बुधवारी (ता. ७) घडली. भरवस्तीतील इमारतीमध्ये अवघ्या तासाभराच्या कालावधीत दोन सदनिका फोडण्यात आल्याने परिसरातील नागरिकांमध्ये मोठी खळबळ उडाली आहे. या प्रकरणी अभय सहदेव देसाई (वय ४९, मूळ रा. भडगाव, सध्या रा. भरणे-बाईतवाडी) यांच्या तक्रारीवरून खेड पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, अभय देसाई हे आदित्य रेसिडेन्सीमधील फ्लॅट क्रमांक १०१ मध्ये राहतात. बुधवारी दुपारी सुमारे १२.१५ वाजण्याच्या सुमारास त्यांनी घर बंद करून बाहेर गेले होते. याच संधीचा फायदा घेत अज्ञात चोरट्यांनी त्यांच्या बंद घराच्या दरवाजाची कडी आणि कुलूप तोडून सदनिकेत प्रवेश केला. घरातील कपाटे तसेच इतर ठिकाणी ठेवण्यात आलेल्या मौल्यवान वस्तूंची झडती घेत चोरट्यांनी मोठ्या प्रमाणात सोन्या-चांदीचे दागिने आणि रोख रक्कम लंपास केली.
देसाई यांच्या फ्लॅटच्या शेजारीच असलेल्या फ्लॅट क्रमांक १०३ मध्येही चोरट्यांनी प्रवेश केला. या सदनिकेचा दरवाजा व कुलूप तोडून घरातील मौल्यवान वस्तू चोरून नेण्यात आल्या. अशा प्रकारे एकाच इमारतीमधील दोन बंद सदनिका लक्ष्य करून चोरट्यांनी अवघ्या काही वेळात घरफोडी केली. दुपारी १.२५ वाजेपर्यंत चोरटे घटनास्थळावरून पसार झाले, त्यामुळे संपूर्ण चोरीचा प्रकार अवघ्या तासाभराच्या कालावधीत घडल्याचे स्पष्ट झाले आहे.
चोरीस गेलेल्या ऐवजामध्ये सुमारे दीड तोळे वजनाच्या दोन सोन्याच्या चेन, अंदाजे २ लाख २० हजार रुपये किमतीच्या, तसेच ६० हजार रुपये किमतीची दोन सोन्याची ब्रेसलेट, १ लाख १० हजार रुपये किमतीच्या दोन जोड्या सोन्याच्या अंगठ्या, १ लाख रुपयांचा सोन्याचा हार, २ लाख रुपये किमतीची सोन्याची तीन नाणी, २० हजार रुपयांचे सोन्याचे टॉप्स, १० हजार रुपयांची सोन्याची बाळी, २५ हजार रुपयांची सोन्याची नथ आणि सुमारे ४० हजार रुपयांचे चांदीचे दागिने यांचा समावेश आहे. याशिवाय चांदीचा कंबरपट्टा आणि १० हजार रुपये रोख रक्कमही चोरीस गेली आहे. चोरी गेलेल्या ऐवजाची एकूण किंमत सुमारे ७ लाख ९८ हजार रुपये असल्याचे तक्रारीत नमूद करण्यात आले आहे.
विशेष म्हणजे, ही घरफोडी रात्रीच्या वेळी नव्हे तर दिवसा भरवस्तीमध्ये आणि रहदारी सुरू असताना करण्यात आली. चोरट्यांनी दोन बंद सदनिकांची कुलपे तोडून आत प्रवेश केला आणि चोरी करून पसार होण्यापर्यंतचा संपूर्ण प्रकार अतिशय कमी वेळेत केला. त्यामुळे चोरट्यांनी परिसराची पूर्वीपासून पाहणी केली असावी, असा संशय व्यक्त केला जात आहे.
या घटनेची माहिती मिळताच खेड पोलिसांनी घटनास्थळी धाव घेतली. घरफोडीच्या पद्धतीचा तसेच घटनास्थळावरील परिस्थितीचा तपास सुरू करण्यात आला आहे. परिसरातील सीसीटीव्ही कॅमेऱ्यांचे फुटेज तपासण्यासह संशयित व्यक्तींची माहिती घेण्याचे काम पोलिसांकडून सुरू आहे. चोरट्यांनी येताना व जाताना कोणत्या मार्गाचा वापर केला, याचाही तपास केला जात आहे.
भरणे-बाईतवाडी परिसरातील मुख्य वस्तीमध्ये दिवसाढवळ्या एकाच इमारतीतील दोन बंद घरे फोडून लाखो रुपयांचा ऐवज चोरीस गेल्याने नागरिकांमध्ये भीतीचे वातावरण निर्माण झाले आहे. भरदिवसा घरफोडी करणाऱ्या चोरट्यांचा बंदोबस्त करून परिसरात पोलिसांची गस्त वाढवावी, अशी मागणी नागरिकांकडून होत आहे. दरम्यान, अज्ञात चोरट्यांचा शोध घेण्यासाठी खेड पोलिसांकडून तपासाची चक्रे वेगाने फिरवली जात आहेत.
