आंगणेवाडी विकास मंडळ व आंगणे कुटुंबीय यांच्या वतीने नरेश आंगणे यांचा सत्कार
मसुरे | झुंजार पेडणेकर
आंगणेवाडीच्या जडण घडणीत, विकासात्मक वाटचालीत आंगणेवाडी विकास मंडळ माजी अध्यक्ष नरेश आंगणे यांचे मोठे योगदान आहे. आंगणेवाडी म्हणजे नरेश आंगणे आणि नरेश आंगणे म्हणजेच आंगणेवाडी असं एक समीकरण आहे. मागील अनेक वर्षे आंगणेवाडी मध्ये झालेल्या विविध शासकीय योजना पूर्णत्वास जाण्यात इतरांप्रमाणे मोठे योगदान नरेश आंगणे यांचे होते असे प्रतिपादन आंगणेवाडी विकास मंडळ प्रमुख कार्यवाह मधुकर आंगणे यांनी येथे केले.
आंगणेवाडी विकास मंडळ व आंगणे कुटुंबीय यांच्या वतीने जत्रोत्सवा नंतर आंगणेवाडी येथे झालेल्या नाट्यप्रयोग दरम्यान आंगणेवाडी साठी विशेष योगदान दिल्या बद्दल स्थानिक मंडळाचे माजी अध्यक्ष नरेश आंगणे यांचा सन्मानपत्र देऊन सत्कार करण्यात आला. प्रकृती अस्वास्थ्यामुळे सदर सन्मानपत्र नरेश आंगणे याना त्यांच्या घरी जाऊन प्रदान करण्यात आले. यावेळी बोलताना बाबू आंगणे म्हणाले, आंगणेवाडीच्या पुण्य भूमी साठी नरेश आंगणे यांचे मोठे योगदान आहे. प्रकृती चांगली नसताना सुद्धा आंगणेवाडीत होणाऱ्या प्रत्येक कार्यक्रमाची ते फोन द्वारे माहिती घेत असतात. जेष्ठ ग्रामस्थ म्हणून सल्ला देत असतात. प्रचंड आत्मीयता त्यांच्या या कृतीमधून दिसून येते. त्यांचे मार्गदर्शन यापुढील काळात सुद्धा आम्हाला लाभावे अशी आई भराडी चरणी प्रार्थना करत असल्याचे ते म्हणाले. यावेळी आंगणेवाडी विकास मंडळ अध्यक्ष भास्कर आंगणे, मधुकर आंगणे, काका आंगणे, दिनेश आंगणे, बाबू आंगणे, छोटू आंगणे, नरेंद्र आंगणे, प्रदीप आंगणे,काका आंगणे, छोटुअंगणे, विजय आंगणे, प्रसाद आंगणे आदींसह आंगणे कुटुंबीय उपस्थित होते. आभार बाबू आंगणे यांनी मानले.
