दापोलीतील कार्यकर्ते संभ्रमात
दापोली l प्रतिनिधी :शिवसेना भाजपा व अजितदादांच्या राष्ट्रवादीचा महायुतीच्या पदाधिकाऱ्यांचे मेळावा रत्नागिरी येथे आज 14 जानेवारी रोजी रविवारी आयोजित करण्यात आला आहे. त्याच्या तयारीच्या बैठकीलाही तीनही पक्षांचे पदाधिकारी एकत्रित असल्याचे चित्र पाहायला मिळाल. पण रत्नागिरी जिल्ह्यातील दापोली नगरपंचायतीमध्ये मात्र शिवसेनेचे उद्धव ठाकरे गटाबरोबर राष्ट्रवादीच्या अजितदादा पवारांचा गट हा अद्यापही सत्तेत सहभागी असल्याचे विरोधाभास दर्शवणारे चित्र जिल्ह्यात पाहायला मिळत आहे. त्यामुळे कार्यकर्त्यांमध्ये संभ्रमाचे वातावरण असून दापोली नगरपंचायतीत ठाकरे गटावरून सहभागी असलेली राष्ट्रवादी नक्की कोणाची असा प्रश्न यास मेळाव्याचे पार्श्वभूमीवर उपस्थित झाला आहे. सत्तेत सहभागी असलेल्या अजित दादांच्या राष्ट्रवादीने शिवसेनेच्या ठाकरे गटाचा हा पाठिंबा काढल्यास दापोली नगरपंचायतीवरील ठाकरे गटाची सत्ता अल्पमतात येऊ शकते हेही स्पष्ट आहे.
दापोलीच्या नगराध्यक्षपदी शिवसेनेच्या ठाकरे गटाच्या ममता मोरे तर उपनगराध्यक्षपदी अजित दादांच्या राष्ट्रवादीचे खालीद रखांगे विराजमान आहेत. आज दिनांक 14 जानेवारी रोजी तयारीच्या बैठकीसाठी रत्नागिरीत गेलेल्या समन्वयक म्हणून बैठकीला उपस्थित असलेल्या राष्ट्रवादीच्या महिला आघाडीच्या उपाध्यक्षा साधना बोत्रे यांचाही दापोली नगरपंचायतीमधील सत्तेत ठाकरे गटाबरोबर सहभाग आहे. त्यामुळे दापोली नगरपंचायतीमधील अजित दादांच्या राष्ट्रवादीचा ठाकरे गटाबरोबर चा सत्तेतील सहभाग आ. योगेश कदम यांना शह देण्यासाठीच कायम असल्याचीही चर्चा आहे.
दोन वर्षांपूर्वी दापोली व मंडणगड नगरपंचायतीच्या सार्वत्रिक निवडणुका झाल्या. त्यावेळी शिवसेनेचे विद्यमान आ. योगेश कदम यांना शह देण्यासाठी तत्कालीन पालकमंत्री अनिल परब यांनी पुढाकार घेत शिवसेना राष्ट्रवादीने आघाडी करून बाजी मारली होती. त्यावेळेला शिवसेवा आघाडीच्या दोन जागा दापोलीत निवडून आल्या तर भाजपची एक जागा निवडून आली उर्वरित 14 जागांवरती शिवसेना व राष्ट्रवादी आघाडीचा विजय झाला. यामध्ये आठ राष्ट्रवादी व शिवसेनेचे सहा असे नगरसेवक निवडून आले. त्यावेळेला नगराध्यक्ष शिवसेनेचा राष्ट्रवादीचा उपनगराध्यक्ष अशी सत्ता स्थापन झाली. शिवसेनेच्या ठाकरे गटाच्या ममता मोरे या विद्यमान नगराध्यक्ष आहेत तर पदाचा उपनगराध्यक्षपदी अजित दादांच्या राष्ट्रवादीचे खालीद रखांगे आहेत.
महाराष्ट्राच्या राजकारणात वर्षभरापूर्वी पुन्हा एकदा झालेल्या राजकीय भूकंपानंतर दापोलीतील राष्ट्रवादीचा नगरपंचायतीमधील गट हा अजित दादांबरोबर व प्रदेशाध्यक्ष सुनील तटकरे यांच्याबरोबर गेला असला तरी प्रत्यक्षात सत्तेत मात्र हे सगळे नगरसेवक शिवसेनेच्या ठाकरे गटाबरोबर सत्तेत सहभागी आहेत. दापोली शहरात प्रवेश करतानाच दापोलीचे उपनगराध्यक्ष खालीद रखांगे यांचा सुनील तटकरे यांच्या बरोबरचा स्वागताचा बॅनरही आहे. त्यामुळे दापोली नगरपंचायतीमध्ये राष्ट्रवादीचे नगरसेवक व उपनगराध्यक्ष हे अजितदादा व तटकरे यांचे की राष्ट्रवादीच्या शरद पवारांचे असा प्रश्न उपस्थित झाला आहे.
दापोलीच्या नगरपंचायतीच्या सत्तेत सहभागी असलेल्या अजित दादांचा राष्ट्रवादी गटातील पदाधिकारी यांच्यातील राजकीय वितुष्ट संपाव त्यांनी एकत्रित काम करावे यासाठी काही महिन्यांपूर्वी प्रदेशाध्यक्ष सुनील तटकरे यांनी मुंबई येथे एकत्रित बैठक घेतली होती मात्र या बैठकीचा फार कोणताही परिणाम न होता अद्यापही हा गट शिवसेनेच्या ठाकरे गटाबरोबर सहभागी असल्याने या सगळ्याला आशीर्वाद कोणाचा? असा प्रश्न उपस्थित झाला आहे.
त्यामुळे आज रत्नागिरी येथे या तीनही पक्षांच्या महायुतीच्या पदाधिकाऱ्यांचा मेळावा एकत्रित आहोत याचा संदेश देण्यासाठी होत असला तरीही दापोली विधानसभा मतदारसंघातील या वातावरणामुळे कार्यकर्त्यांमध्ये मात्र संभ्रमाचे वातावरण आहे. दापोली नगरपंचायतीमध्ये शिवसेनेच्या उद्धव ठाकरे गटाबरोबर सत्तेत सहभागी असलेले राष्ट्रवादी नक्की कोणाची? असा प्रश्न कार्यकर्त्यांनाही पडला आहे.
अयोध्या येथील श्रीराम मंदिराच्या उद्घाटन सोहोळ्याच्या पार्श्वभूमीवरती अक्षदा घेऊन गेलेल्या त्या महिलांचा अपमान करण्याचा प्रयत्न करणाऱ्या ठाकरे गटाच्या नगरसेवकाला भाजपाच्या पदाधिकाऱ्यांनी एकत्र येत दापोली पोलीस ठाण्यात माफी मागायला लावली. यावेळी शिवसेना भाजपाचे पदाधिकारी गेल्या आठवड्यात एकत्र आले होते. त्यावेळीही दापोली येथील अजित दादांच्या राष्ट्रवादीचा एकही पदाधिकारी अथवा नगरसेवक यावेळेला शिवसेना भाजपाच्या पदाधिकाऱ्यांसमवेत उपस्थित नव्हता याबाबतही आश्चर्य व्यक्त होत आहे.
