ओव्हल, इंग्लंड – भारत आणि इंग्लंड यांच्यातील पाच सामन्यांची कसोटी मालिका अत्यंत चुरशीच्या लढतीनंतर २-२ अशी बरोबरीत सुटली आहे. मालिकेतील पाचव्या आणि अंतिम कसोटी सामन्यात भारताने यजमान इंग्लंडचा अवघ्या ६ धावांनी पराभव करत हा ऐतिहासिक विजय मिळवला. मोहम्मद सिराजच्या भेदक गोलंदाजीमुळे भारताला हा विजय साकारता आला, त्याने सामन्यात एकूण ५ बळी घेत विजयाचा शिल्पकार ठरला.
अंतिम कसोटीचा पाचवा दिवस सुरू झाला तेव्हा सामना दोन्ही संघांसाठी खुला होता. इंग्लंडला विजयासाठी आणखी धावांची गरज होती, तर भारताला शेवटचे काही बळी मिळवणे आवश्यक होते. दिवसाच्या सुरुवातीलाच मोहम्मद सिराजने इंग्लंडला दोन मोठे धक्के दिले. त्याने जेमी स्मिथ आणि जेमी ओव्हरटन यांना लवकर माघारी धाडत इंग्लंडची स्थिती ८ बाद ३५५ अशी केली. त्यानंतर प्रसिद्ध कृष्णाने जोश टंगला क्लीन बोल्ड केले.
असे वाटत होते की भारताचा विजय आता निश्चित आहे, पण जखमी ख्रिस वोक्स आणि अॅटकिन्सन यांनी शेवटच्या क्षणापर्यंत झुंज दिली. अॅटकिन्सनने काही जोरदार फटके मारत इंग्लंडच्या विजयाच्या आशा पल्लवित ठेवल्या. पण, भारताला विजयासाठी फक्त एका विकेटची गरज असताना, मोहम्मद सिराजने पुन्हा एकदा निर्णायक कामगिरी केली. त्याने ॲटकिन्सनला क्लीन बोल्ड करत भारताला थरारक विजय मिळवून दिला. इंग्लंडचा संपूर्ण डाव ३६७ धावांवर संपुष्टात आला.
या विजयामुळे भारताने मालिका २-२ अशी बरोबरीत राखली. मोहम्मद सिराजने घेतलेल्या पाच विकेट्समुळे भारताचा हा विजय अधिक संस्मरणीय ठरला. या मालिकेतील दोन्ही संघांनी दाखवलेला कडवा संघर्ष क्रिकेटप्रेमींच्या कायम स्मरणात राहील.
