खेड (प्रतिनिधी) – खेड तालुक्यातील लवेल येथील नामांकित Gharada Institute of Technology मध्ये रासायनिक अभियांत्रिकी विभागामार्फत “बेस्ट स्टुडंट पुरस्कार” समारंभ तसेच National Science Day उत्साहपूर्ण वातावरणात साजरा करण्यात आला. कार्यक्रमास टेक्निकल डायरेक्टर डॉ. ए. बी. मराठे यांची प्रमुख उपस्थिती लाभली, तर प्राचार्य डॉ. प्रमोद पाटील यांच्या मार्गदर्शनामुळे कार्यक्रमाला विशेष महत्त्व प्राप्त झाले.
यावेळी डॉ. मराठे यांनी आपल्या मनोगतात विज्ञानाधारित शिक्षण, संशोधन वृत्ती आणि नवोपक्रम यांचे महत्त्व अधोरेखित करत विद्यार्थ्यांनी उज्ज्वल भविष्यासाठी सातत्याने प्रयत्नशील राहावे, असे आवाहन केले. उपप्राचार्य डॉ. एस. के. पाटील यांनीही विद्यार्थ्यांचे अभिनंदन करून त्यांच्या परिश्रमांचे कौतुक केले आणि पुढील वाटचालीसाठी प्रेरणादायी मार्गदर्शन केले.
या समारंभात “बेस्ट स्टुडंट पुरस्कार” प्राप्त विद्यार्थ्यांमध्ये बासिल दळवी (द्वितीय वर्ष), सेहरान अधिकारी (तृतीय वर्ष) आणि साहिल खसासे (अंतिम वर्ष) यांचा समावेश होता. शैक्षणिक गुणवत्ता, नेतृत्वगुण आणि सहशैक्षणिक उपक्रमांतील सक्रिय सहभाग या निकषांवर त्यांची निवड करण्यात आली. विभागप्रमुख डॉ. एस. जे. कुलकर्णी तसेच रासायनिक अभियांत्रिकी विभागातील सर्व प्राध्यापकांनी पुरस्कारप्राप्त विद्यार्थ्यांचे अभिनंदन करून त्यांच्या उज्ज्वल भविष्यासाठी शुभेच्छा दिल्या.
या पुरस्कारांसाठी प्रायोजकत्व देणारे विभागाचे माजी विद्यार्थी श्री. मोईन चौगुले यांचेही यावेळी विशेष आभार मानण्यात आले. त्यांच्या सहकार्यामुळे विद्यार्थ्यांना प्रोत्साहन मिळून अशा उपक्रमांना अधिक बळ मिळत असल्याचे नमूद करण्यात आले.
कार्यक्रमाचे नियोजन, समन्वय आणि यशस्वी अंमलबजावणी डॉ. एस. डी. डोके यांनी अत्यंत कौशल्याने पार पाडली. त्यांच्या प्रयत्नांमुळे हा पुरस्कार समारंभ आणि राष्ट्रीय विज्ञान दिनाचे आयोजन सुरळीत व प्रभावीपणे पार पडले. या उपक्रमामुळे विद्यार्थ्यांमध्ये विज्ञानाविषयीची आवड वाढीस लागून उत्कृष्टतेकडे वाटचाल करण्यासाठी नवी प्रेरणा मिळाल्याची भावना यावेळी व्यक्त करण्यात आली.
