रत्नागिरी:
रत्नागिरीतील खरेदीप्रेमी आणि खवय्यांसाठी एक आनंदाची बातमी आहे. गेल्या ‘कंझ्युमर शॉपी’ला मिळालेल्या उत्स्फूर्त प्रतिसादानंतर, ग्राहक आणि विक्रेत्यांच्या आग्रहाखातर मराठा मंडळ, रत्नागिरी यांच्या वतीने विशेष ‘खरेदी महोत्सव आणि खाद्य जत्रा’ आयोजित करण्यात आली आहे. हा तीन दिवसीय उत्सव १०, ११ आणि १२ एप्रिल २०२६ रोजी पार पडणार असून रत्नागिरीकरांना एकाच छताखाली विविध वस्तूंची खरेदी करण्याची आणि चविष्ट पदार्थांचा आस्वाद घेण्याची सुवर्णसंधी मिळणार आहे.
या महोत्सवाचे प्रमुख आकर्षण म्हणजे एकाच ठिकाणी उपलब्ध असलेले विविध प्रकारचे स्टॉल्स. यामध्ये आधुनिक फॅशनचे कपडे, साड्या, दागिने (ज्वेलरी), कॉस्मेटिक्स, मातीच्या कलाकुसरीची भांडी, स्कूल बॅग्स आणि पर्स यांसह अनेक वस्तूंची रेलचेल असणार आहे. खरेदीसोबतच खवय्यांसाठी स्वतंत्र खाद्य जत्रा असून, तिथे शाकाहारी (व्हेज) आणि मांसाहारी (नॉन-व्हेज) पदार्थांची मेजवानी मिळणार आहे.
कुटुंबातील सर्वांच्या मनोरंजनासाठी महोत्सवात ‘फनी गेम्स’ आणि इतर विविध सांस्कृतिक कार्यक्रमांचेही आयोजन करण्यात आले आहे. हा कार्यक्रम सकाळी १०:०० ते रात्री ८:३० या वेळेत मराठा भवन, माळनाका, रत्नागिरी येथे सर्वांसाठी खुला असेल. तरी जास्तीत जास्त रत्नागिरीकरांनी या महोत्सवाला भेट देऊन खरेदीचा आणि खाद्याचा आनंद घ्यावा, असे आवाहन मराठा मंडळातर्फे करण्यात आले आहे.
