हिरवट पडलेल्या अवयवांमुळे विषबाधेची शक्यता
अन्न, औषध आणि इतर नमुन्यांची सखोल तपासणी सुरू
मुंबईतील डोकाडिया कुटुंबाच्या मृत्यू प्रकरणात फॉरेन्सिक अहवालातून गंभीर बाबी समोर आल्या आहेत. कुटुंबातील सदस्यांनी बिर्याणी आणि त्यानंतर कलिंगड खाल्ल्यानंतर त्यांना उलट्या आणि जुलाबाचा त्रास सुरू झाला होता. तपासात मृतांच्या शरीरातील काही अवयव हिरवट पडल्याचे आढळले आहे. ही बाब सामान्य अन्नबाधेपेक्षा वेगळी असल्याचे तज्ज्ञांचे मत आहे. या प्रकरणात विषबाधा किंवा औषधांचा प्रभाव याबाबत तपास अधिक तीव्र करण्यात आला आहे.
मुंबई : डोकाडिया कुटुंबातील चार सदस्यांच्या मृत्यू प्रकरणात आता फॉरेन्सिक अहवालातून धक्कादायक माहिती समोर आली आहे. मृतांच्या मेंदू, यकृत आणि आतड्यांमध्ये हिरवट बदल झाल्याचे निदर्शनास आले असून, ही स्थिती सामान्य अन्नबाधेपेक्षा वेगळी असल्याचे डॉक्टरांनी स्पष्ट केले आहे. त्यामुळे विषबाधेची शक्यता अधिक बळावली आहे.
घटनेपूर्वी कुटुंबाने बिर्याणी खाल्ली होती आणि त्यानंतर मध्यरात्री कलिंगड खाल्ले होते. त्यानंतर उलट्या, जुलाब, चक्कर आणि पोटदुखी अशी लक्षणे दिसू लागली. दोन लहान मुली बेशुद्ध पडल्या आणि त्यांना रुग्णालयात नेण्यात आले, मात्र एकीला डॉक्टरांनी मृत घोषित केले. नंतर इतर सदस्यांचाही मृत्यू झाला.
शवविच्छेदन अहवालात मृतांच्या शरीरात वेदनाशामक औषधांचे अंश आढळले आहेत. यामध्ये मॉर्फिनचे अंश देखील सापडल्याचे समोर आले आहे. यामुळे अन्नातून विषबाधा झाली की औषधांचा परिणाम झाला, याचा तपास सुरू आहे.
तपास यंत्रणांनी घरातून कलिंगड, पाणी, कच्चा भात, मसाले, खजूर आणि इतर खाद्यपदार्थांचे नमुने जप्त केले आहेत. एकूण ११ नमुन्यांची तपासणी फॉरेन्सिक लॅबमध्ये करण्यात आली आहे. या सर्व घटकांचा अभ्यास करून घटनेमागील नेमके कारण शोधण्याचे प्रयत्न सुरू आहेत.
सध्या हा घातपात आहे की औषधाची तीव्र प्रतिक्रिया, हा प्रश्न कायम आहे. या प्रकरणाने शहरात मोठी खळबळ उडाली असून, पुढील अहवालाकडे सर्वांचे लक्ष लागले आहे.
