देवरूख (प्रतिनिधी):
संगमेश्वर तालुक्यातील देवरूख ग्रामीण रुग्णालयातील स्वच्छतेच्या स्थितीबाबत रुग्ण व त्यांच्या नातेवाईकांकडून नाराजी व्यक्त केली जात आहे. रुग्णालयातील काही वॉर्डमध्ये वापरात असलेल्या चादरींवर डाग दिसून येत असल्याचा तसेच स्वच्छतागृहांची स्वच्छता समाधानकारक नसल्याचा आरोप करण्यात आला आहे.
या परिस्थितीमुळे रुग्णांच्या आरोग्याच्या दृष्टीने चिंता व्यक्त होत असून संबंधित प्रशासनाने तातडीने लक्ष देण्याची मागणी होत आहे. रुग्णालयात दाखल होणाऱ्या रुग्णांना स्वच्छ आणि निर्जंतुक वातावरण मिळणे अपेक्षित असते. मात्र, काही बेडवरील चादरींवर रक्ताचे डाग असल्याचे निदर्शनास आल्याचा दावा करण्यात आला आहे. अशा चादरी तात्काळ बदलून स्वच्छ चादरी उपलब्ध करून द्याव्यात, अशी मागणी रुग्ण व नातेवाईकांनी केली आहे. तसेच रुग्णालयातील स्वच्छतागृहांची स्वच्छता अपुरी असल्याचेही सांगितले जात आहे. काही ठिकाणी घाण साचलेली असून दुर्गंधीचा त्रास होत असल्याचा आरोप आहे.
पाण्यासाठी ठेवलेल्या बादल्यांसह इतर साहित्याचीही नियमित स्वच्छता होत नसल्याची तक्रार करण्यात आली आहे. त्यामुळे रुग्ण आणि त्यांच्या नातेवाईकांना गैरसोयीला सामोरे जावे लागत असल्याचे त्यांनी सांगितले. अस्वच्छतेमुळे डासांची वाढ होण्याची शक्यता असून संसर्गजन्य आजारांचा धोका वाढू शकतो, अशी भीती व्यक्त केली जात आहे. रुग्णालय परिसराची नियमित स्वच्छता, निर्जंतुकीकरण आणि स्वच्छ चादरींची उपलब्धता याकडे प्रशासनाने गांभीर्याने लक्ष द्यावे, अशी मागणी होत आहे. या संपूर्ण प्रकरणाची वरिष्ठ आरोग्य अधिकाऱ्यांनी दखल घेऊन प्रत्यक्ष पाहणी करावी, आवश्यक त्या सुधारणा तातडीने कराव्यात आणि रुग्णांना स्वच्छ व सुरक्षित आरोग्यसेवा उपलब्ध करून द्यावी, अशी अपेक्षा रुग्ण व नागरिकांकडून व्यक्त करण्यात येत आहे.
