# ब्लूबगिंग म्हणजे काय आणि त्याचा धोका किती?
स्मार्टफोन वापरताना कोणती काळजी घ्यावी?
स्मार्टफोनमध्ये ब्लूटूथ सतत सुरू ठेवणे आता धोकादायक ठरू शकते. सायबर गुन्हेगार ‘ब्लूबगिंग’ या तंत्राचा वापर करून मोबाईलमध्ये अनधिकृत प्रवेश मिळवू शकतात. यामुळे बँक खात्याची माहिती, वैयक्तिक डेटा आणि इतर गोपनीय माहिती चोरीला जाण्याचा धोका वाढतो. ब्लूटूथचा वापर गरजेनुसारच करणे आणि काही मूलभूत सुरक्षा उपाय पाळणे अत्यंत महत्त्वाचे आहे. थोडीशी काळजी घेतल्यास अशा सायबर फसवणुकीपासून स्वतःचे संरक्षण करता येऊ शकते.
प्रहार डिजिटल : तुम्ही तुमच्या स्मार्टफोनचे ब्लूटूथ दिवसभर सुरू ठेवत असाल, तर आता सावध होण्याची वेळ आली आहे. सध्या सायबर गुन्हेगार ‘ब्लूबगिंग’ (Bluebugging) या आधुनिक तंत्राचा वापर करून मोबाईलमध्ये प्रवेश मिळवत आहेत. यामुळे बँक खात्यातील पैसे चोरीला जाण्याबरोबरच वैयक्तिक आणि गोपनीय माहिती लीक होण्याचाही मोठा धोका निर्माण होऊ शकतो.
‘ब्लूबगिंग’ ही अशी एक सायबर हॅकिंग पद्धत आहे, ज्यामध्ये हॅकर्स ब्लूटूथ कनेक्शनचा गैरफायदा घेत मोबाईलमध्ये अनधिकृत प्रवेश मिळवतात. एकदा प्रवेश मिळाल्यानंतर ते कॉल, मेसेज, संपर्क क्रमांक, फोटो आणि इतर संवेदनशील माहितीवर नियंत्रण मिळवू शकतात. काही प्रकरणांमध्ये आर्थिक व्यवहारांनाही धोका निर्माण होऊ शकतो.
तज्ज्ञांच्या मते, गरज नसताना ब्लूटूथ सुरू ठेवणे टाळावे. सार्वजनिक ठिकाणी अनोळखी ब्लूटूथ डिव्हाइसशी कनेक्ट होणे धोकादायक ठरू शकते. तसेच फोनचे सॉफ्टवेअर आणि सिक्युरिटी अपडेट्स नियमितपणे अपडेट ठेवणे आवश्यक आहे.
याशिवाय दोन-स्तरीय सुरक्षा (Two-Factor Authentication) वापरणे, संशयास्पद कनेक्शन नाकारणे आणि गरज संपल्यानंतर ब्लूटूथ बंद करणे हे उपाय अवलंबल्यास अशा प्रकारच्या सायबर हल्ल्यांपासून मोठ्या प्रमाणात बचाव करता येऊ शकतो.
