रत्नागिरी (प्रतिनिधी):
तुम्ही तुमच्या हातातला मोबाईल वापरत असताना अचानक स्क्रीनवर ‘सिस्टिम अपडेट’चा मेसेज आला, तर सावधान! कारण एका साध्या ‘अपडेट’च्या नावाने एका तरुणाचे बँक खाते पार रिकामे केले आहे. रत्नागिरीतील अभ्युदयनगर परिसरात ही खळबळजनक घटना घडली असून, सायबर चोरट्यांनी तरुणाच्या क्रेडिट कार्ड आणि बचत खात्यातून २ लाख ५४ हजार २०० रुपये लांबवले आहेत.
नेमके काय घडले?
नाचणे रोड येथील अभ्युदयनगर परिसरात राहणारे नारायण दिनेश घोलप (वय ३४) हे बुधवारी (२९ जुलै) सकाळी ९.३० च्या सुमारास घरी असताना अचानक त्यांच्या मोबाईलवर ‘सिस्टिम अपडेट’ची प्रोसेस सुरू झाली. मोबाईल हँग झाला की स्वतःहून अपडेट होतोय, असा समज झाल्याने त्यांनी काही वेळ वाट पाहिली. पण, हा मोबाईल अपडेट होत नव्हता… तर पडद्यामागून सायबर भामट्यांचा दरोडा सुरू होता!
गुगल आयपीटीव्ही (Google IPTV) अॅपचा फास
काही क्षणांतच फिर्यादींच्या मोबाईलमध्ये ‘Google IPTV’ नावाचे अॅप आपोआप डाऊनलोड झाले. या अॅपच्या माध्यमातून चोरट्यांनी मोबाईलचा पूर्ण अॅक्सेस (रिमोट कंट्रोल) स्वतःकडे घेतला. यानंतर पुढील एका तासाच्या आत (सकाळी ९.३० ते १०.३०) नारायण यांच्या मोबाईलवर धडाधड मेसेजेस येणे सुरू झाले:
क्रेडिट कार्ड: ५ वेगवेगळ्या ट्रान्सझॅक्शनद्वारे ₹२,५०,००० गायब!
बचत खाते: खात्यातून ₹४,२०० परस्पर साफ!
अवघ्या ६० मिनिटांत तब्बल २ लाख ५४ हजार २०० रुपयांचा चुना लागल्याचे लक्षात येताच नारायण घोलप यांच्या पायाखालची जमीनच सरकली.
शहर पोलिसांत गुन्हा दाखल
आपली फसवणूक झाल्याचे स्पष्ट झाल्यानंतर नारायण घोलप यांनी तातडीने रत्नागिरी शहर पोलीस ठाण्यात धाव घेत तक्रार नोंदवली आहे. पोलिसांनी अज्ञातांविरोधात गुन्हा दाखल केला असून, हे रॅकेट कुठे बसून चालवले जात आहे, याचा तपास शहर पोलीस करत आहेत.
