चिपळूण (प्रतिनिधी) : लोकशाही, शेतकऱ्यांचे प्रश्न आणि सरकारच्या विविध धोरणांविरोधात २ ऑक्टोबर रोजी गांधी जयंतीच्या दिवशी निषेध मोर्चा काढण्याचे नियोजन करण्यात येत आहे. या मोर्चाच्या नियोजनासाठी इंडिया आघाडी तसेच सर्व पुरोगामी विचारांच्या संघटनांची बैठक आयोजित करण्यात आली आहे.
आयोजकांच्या म्हणण्यानुसार, निवडणूक आयुक्त ज्ञानेश कुमार यांच्या माध्यमातून निवडणूक प्रक्रियेत कथित घोटाळा होत असल्याचा आरोप, कोकणातील दुष्काळसदृश्य परिस्थितीत शेतकऱ्यांना नुकसानभरपाईपासून वंचित ठेवले जात असल्याचा दावा, तसेच सरकारचे विविध आघाड्यांवरील कथित अपयश या मुद्द्यांवरून हा निषेध मोर्चा काढण्यात येणार आहे. या पार्श्वभूमीवर गुरुवार, ३० सप्टेंबर रोजी सायंकाळी ४.३० वाजता आमदार भास्करशेठ जाधव यांच्या पाग येथील कार्यालयात बैठक आयोजित करण्यात आली आहे. या बैठकीत २ ऑक्टोबर रोजी होणाऱ्या निषेध मोर्चाची रूपरेषा, नियोजन तसेच विविध जबाबदाऱ्या निश्चित करण्यात येणार आहेत. इंडिया आघाडीतील घटक पक्षांसह सर्व पुरोगामी विचारांच्या संघटनांचे पदाधिकारी व कार्यकर्त्यांनी या बैठकीला आवर्जून उपस्थित राहावे, असे आवाहन भरत लब्धे यांनी केले आहे. दरम्यान, या बैठकीत मोर्चाचा मार्ग, सहभागी संघटनांची भूमिका आणि नियोजनासंदर्भातील अन्य बाबींवर चर्चा होण्याची शक्यता आहे.
