आमदार दीपक केसरकर आणि जि. प. अध्यक्ष प्रमोद कामत यांची प्रमुख उपस्थिती
दोडामार्ग (सुहास देसाई ):
दुष्काळावर मात करण्यासाठी आणि ‘पाणी अडवा, पाणी जिरवा’ या संकल्पनेला प्रत्यक्ष कृतीची जोड देण्यासाठी आंबडगाव (ता. दोडामार्ग) येथे भव्य जलसंधारण उपक्रम पार पडला. लोकसहभाग, लोकप्रतिनिधी आणि प्रशासकीय अधिकारी व कर्मचाऱ्यांच्या उत्स्फूर्त श्रमदानातून अवघ्या एका दिवसात तब्बल २० वनराई बंधारे यशस्वीरीत्या बांधण्यात आले. या उपक्रमामुळे पावसाचे वाहून जाणारे पाणी अडवून भूजल पातळी वाढविण्यास आणि परिसरातील जलस्रोतांचे पुनर्भरण करण्यास मोठी चालना मिळणार आहे.
या जनजागृती व प्रत्यक्ष श्रमदान उपक्रमात माजी मंत्री तथा आमदार दीपक केसरकर, सिंधुदुर्ग जिल्हा परिषद अध्यक्ष प्रमोद कामत, भगीरथ प्रतिष्ठानचे डॉ. प्रसाद देवधर, ग्रामसेवक संघटनेचे अध्यक्ष जनार्दन खानोलकर, आणि सरपंच संघटनेचे अध्यक्ष अनिल शेटकर यांच्यासह जिल्हा परिषद व पंचायत समितीचे विविध सभापती, उपसभापती आणि सदस्य मोठ्या संख्येने सहभागी झाले होते. लोकप्रतिनिधींसह मान्यवरांनी स्वतः हातात घमेली व फावडे घेऊन प्रत्यक्ष श्रमदान केले.
लोकसहभागातून जलसंधारणाचा नवा आदर्श
पावसाळ्यात उंचावरून वाहून जाणारे पाणी स्थानिक पातळीवर अडवून ते जमिनीत मुरवणे आणि भविष्यातील भीषण पाणीटंचाईवर मात करणे हा या वनराई बंधाऱ्यांच्या उभारणीमागील मुख्य हेतू आहे. या उपक्रमाच्या माध्यमातून केवळ बंधारे बांधण्यात आले नाहीत, तर “जलसंधारण ही केवळ सरकारची नव्हे तर प्रत्येकाची सामूहिक जबाबदारी आहे,” असा सकारात्मक संदेश संपूर्ण तालुक्याला देण्यात आला.
आंबडगाव येथे एकाच दिवसात २० बंधारे उभारल्याने परिसरातील ग्रामस्थांमध्ये उत्साहाचे व सकारात्मकतेचे वातावरण निर्माण झाले आहे. लोकप्रतिनिधी, शासकीय अधिकारी, सामाजिक कार्यकर्ते आणि ग्रामस्थ यांनी एकत्र येत केलेल्या या कामामुळे ‘लोकसहभागातून जलसंधारण’ ही संकल्पना खऱ्या अर्थाने यशस्वी ठरली आहे.
प्रशासकीय अधिकारी व पदाधिकाऱ्यांची मोठी उपस्थिती
या उपक्रमात भाजप तालुकाध्यक्ष तथा जिल्हा परिषद सदस्य दीपक गवस, सभापती पार्वती गवस, उपसभापती गणेशप्रसाद गवस, राजेंद्र निंबाळकर, पंचायत समिती सदस्या नेहा गवस, सायली निंबाळकर, तहसीलदार राहुल गुरव, गट विकास अधिकारी (BDO) अजिंक्य सावंत, कृषी अधिकारी, तसेच विविध शासकीय विभागांचे प्रमुख व कर्मचारी, पत्रकार संघटनेचे पदाधिकारी आणि सर्व माध्यमांचे प्रतिनिधी मोठ्या संख्येने उपस्थित होते.
सामूहिक प्रयत्नांचे कौतुक
उपक्रम यशस्वीरीत्या पार पडल्यानंतर आयोजकांच्या वतीने प्रत्यक्ष श्रमदान करणाऱ्या सर्व मान्यवरांचे, अधिकाऱ्यांचे आणि ग्रामस्थांचे मनःपूर्वक आभार मानण्यात आले. “सर्वांच्या सामूहिक प्रयत्नांमुळे आणि श्रमदानामुळे हा जलसंधारण उपक्रम अत्यंत यशस्वी ठरला असून, भविष्यातही अशाच प्रकारे सर्वांचे सहकार्य लाभेल,” अशी आशा यावेळी व्यक्त करण्यात आली. आंबडगावातील हे यश तालुक्यातील इतर गावांसाठी जलसंधारणाच्या लोकचळवळीचे एक प्रेरणादायी उदाहरण ठरले आहे.
