सभापतीपद अनुसुचित जाती महिला प्रवर्गासाठी आरक्षित
सावंतवाडी । प्रतिनिधी : सावंतवाडी पंचायत समितीच्या सभापतीपदाचे आरक्षण अखेर जाहीर झाले असून, यावेळचे सभापतीपद महिलांसाठी अनुसूचित जाती प्रवर्गासाठी आरक्षित झाले आहे. यामुळे पुन्हा एकदा सावंतवाडी पंचायत समितीवर ‘महिलाराज’ पाहायला मिळणार आहे. आगामी २४ व्या सभापतीपदी कोणाची निवड होणार, याकडे राजकीय वर्तुळासह सर्वांचे लक्ष लागून राहिले आहे.
जिल्हाधिकारी कार्यालयात जिल्हाधिकारी तृप्ती थोडमिसे यांच्या समक्ष ही आरक्षण सोडत नुकतीच काढण्यात आली. आरक्षण जाहीर होताच, राजकीय गोटात चर्चांना उधाण आले आहे.
अनुसूचित जाती महिलेला संधी
मागील कार्यकाळातही सभापतीपद महिलांकडेच होते. त्यावेळी मानसी धुरी आणि निकिता सावंत यांनी सभापती म्हणून यशस्वीपणे काम पाहिले होते. आता आरक्षण ‘अनुसूचित जाती महिलां’साठी राखीव झाल्यामुळे, या प्रवर्गातून कोणत्या महिलेला सभापतीपदाची संधी मिळते हे पाहणे महत्त्वाचे ठरणार आहे.
या पार्श्वभूमीवर, स्थानिक राजकारणात सक्रिय असलेल्या महायुती आणि महाविकास आघाडी या दोन्ही प्रमुख राजकीय गटांकडून योग्य उमेदवाराची चाचपणी सुरू झाली आहे. या गटांमध्ये अनुसूचित जाती प्रवर्गातील सक्षम महिला सदस्या कोण आहेत, त्यांची संख्या किती आहे आणि कोणता गट बाजी मारतो, हे पाहणे उत्सुकतेचे ठरणार आहे.
*९ व्यांदा महिलेला मान*
यंदाच्या सभापती या सावंतवाडी पंचायत समितीच्या २४ व्या सभापती ठरणार आहेत. विशेष म्हणजे, आतापर्यंतच्या कार्यकाळात ९ व्यांदा महिलेला सभापतीपदाची संधी मिळणार आहे, जो येथील राजकारणात महिलांच्या वाढत्या सहभागाचे आणि महत्त्वाचे स्थान दर्शवतो.
महिलांसाठी राखीव झालेल्या या जागेमुळे सावंतवाडी पंचायत समितीच्या राजकारणात एक नवा अध्याय सुरू झाला आहे. दोन्ही आघाड्यांकडून सुरू असलेल्या मोर्चेबांधणीमुळे सभापतीपदासाठी चुरस वाढणार असून, २४ व्या सभापतीपदाचा मान कोणाला मिळतो, हे लवकरच स्पष्ट होईल.
