दुधसंघ स्थापन करण्याच्या दिशेने महत्त्वपूर्ण पाऊल
दापोली :
– दापोली, मंडणगड आणि खेड तालुक्यातील दूध उत्पादन वाढवण्यासाठी तसेच या क्षेत्रात करिअर घडवू इच्छिणाऱ्या तरुणांना संधी उपलब्ध करून देण्यासाठी विशेष जाहीर मेळावा आयोजित करण्यात आला आहे. आमदार श्री. नमदार योगेशदादा रामदासभाई कदम यांच्या मार्गदर्शनाखाली हा उपक्रम राबवला जाणार असून, मतदार संघातील शेतकऱ्यांना स्वतःचा दुधसंघ उभा करण्याचा मार्ग खुला करण्याचा हा प्रयत्न आहे.
आज पश्चिम महाराष्ट्रातील ‘गोकूळ’, वारणा, ‘अमूल’ यांसारख्या दुधसंघांनी स्थानिक शेतकऱ्यांच्या जीवनमानात आमूलाग्र बदल घडवून आणला आहे. त्याच धर्तीवर कोकणातील शेतकऱ्यांनाही दुधसंघाच्या माध्यमातून बाजारपेठ उपलब्ध व्हावी, शेतकऱ्यांना दुधाचे खरे मूल्य मिळावे आणि खरेदी करणाऱ्या कंपन्यांकडून होणारे पिळवणूक व फसवणूक थांबावी, हा या मेळाव्याचा मुख्य उद्देश आहे. या पार्श्वभूमीवर २४ नोव्हेंबर २०२५ रोजी सकाळी १० वाजता श्रीमंगल कार्यालय, दापोली येथे हा जाहीर मेळावा आयोजित करण्यात आला असून, या कार्यक्रमास आमदार श्री. योगेशदादा कदम प्रमुख उपस्थित राहणार आहेत. या मेळाव्यात दुधसंघ स्थापन करण्यासंबंधी सर्व माहिती दिली जाईल, तसेच शेतकऱ्यांना या संधीचा लाभ घेण्याचे आवाहन आयोजकांकडून करण्यात आले आहे. शेतकऱ्यांसाठी हा मेळावा अत्यंत महत्त्वाचा ठरणार असून, कोकणात दुधसंघ उभारणीची प्रक्रिया गतीमान करण्यासाठी हा मोठा निर्णय मानला जात आहे. उपस्थित राहणाऱ्या सर्व शेतकऱ्यांनी आधारकार्डची झेरॉक्स आणि सभासद नोंदणीसाठी १०२५ रुपयांची फी सोबत आणण्याचे आवाहन करण्यात आले आहे. सभासद फॉर्म मेळाव्याच्या ठिकाणी उपलब्ध करून देण्यात येणार आहेत.
हा मेळावा रत्नागिरी जिल्हा मध्यवर्ती बँकेचे संचालक श्री. सुशिर कोळेकर, पशुसंवर्धन विभागाचे उपविभागीय अधिकारी मा. डॉ. श्री. दत्तात्रय सोनावळे यांच्या मार्गदर्शनाखाली आयोजित करण्यात आला आहे. दापोली, मंडणगड आणि खेड तालुक्याचे प्रमुख पदाधिकारी तसेच स्थानिक कार्यकर्ते या आयोजनात सहभागी आहेत. दूध उत्पादन वाढवण्यासाठी, शेतकऱ्यांच्या उत्पन्नात स्थैर्य आणण्यासाठी आणि कोकणात दुधआधारित उद्योगांच्या वाढीसाठी हा मेळावा महत्त्वपूर्ण ठरेल, अशी अपेक्षा व्यक्त करण्यात येत आहे.
