दोडामार्ग | प्रतिनिधी
दशावतार ही कोकणची लोककला असून, या कलेच्या माध्यमातून दोडामार्ग तालुक्याचे नाव सिंधुदुर्गसह गोवा, मुंबई, कोल्हापूर आणि पुणे अशा विविध ठिकाणी पोहोचवणाऱ्या सिद्धिविनायक दशावतार नाट्य मंडळ, पिकुळे या मंडळाचा हेवाळे येथे यथोचित गौरव करण्यात आला. “अशा उत्कृष्ट मंडळाचा सन्मान करण्याची संधी मिळणे हे आम्ही आमचे भाग्यच समजतो,” असे गौरवोद्गार हेवाळे गावच्या सरपंच सौ. साक्षी संदीप देसाई यांनी यावेळी काढले.
श्री राम मंदिर वर्धापन दिन सोहळा
हेवाळे मुळस येथील श्री राम मंदिराचा द्वितीय प्राणप्रतिष्ठा वर्धापन दिन ‘सातेरी मायदेव युवा मंडळ’ आणि ग्रामस्थांच्या वतीने मोठ्या उत्साहात साजरा करण्यात आला. या सोहळ्यासाठी भाविकांनी अलोट गर्दी केली होती. या मंगलप्रसंगी सिद्धिविनायक दशावतार नाट्य मंडळाने सुंदर निरवेकर यांच्या कथासंकल्पनेतील ‘नाग भस्म तिलक’ हे रहस्यमय आणि धडाकेबाज नाटक सादर केले. कलाकारांच्या कसदार अभिनयाला उपस्थित रसिक प्रेक्षकांनी प्रचंड प्रतिसाद दिला.
कलाकारांचा सन्मान
नाटकाच्या सादरीकरणानंतर मंडळाचे मालक शत्रू गवस यांचा भाऊसाहेब देसाई, मधुसूदन गवस आणि संदीप देसाई यांच्या हस्ते शाल व श्रीफळ देऊन विशेष सत्कार करण्यात आला.
यावेळी व्यासपीठावर गोविंद गवस, बापूसाहेब देसाई, सूर्यकांत देसाई, तानाजी देसाई, संतोष देसाई, प्रमोद गवस, स्वप्नील देसाई, ऋषभ देसाई, आर. एन. गवस आणि ग्रामस्थ मोठ्या संख्येने उपस्थित होते. दोडामार्ग तालुक्यातील या दशावतार मंडळाने आपल्या दर्जेदार सादरीकरणाने सर्वत्र लौकिक मिळवल्याबद्दल सर्व स्तरांतून त्यांचे कौतुक होत आहे.
