हजारो भाविकांच्या उपस्थितीत भक्तिमय सोहळा
सामाजिक कार्यकर्ते दिनेश गावडे यांच्याकडून महाप्रसादाचे आयोजन
सावंतवाडी | प्रतिनिधी : सिंधुदुर्ग जिल्ह्यातील निसर्गरम्य चौकुळ गावचे ग्रामदैवत श्री देवी सातेरी-भावईचा वार्षिक सप्ताह उत्सव नुकताच मोठ्या भक्तीभावात आणि उत्साहात पार पडला. या सोहळ्यासाठी जिल्हाभरातून हजारो भाविकांनी हजेरी लावली होती. या निमित्ताने आयोजित करण्यात आलेल्या भव्य महाप्रसादाचा लाभ सुमारे चार हजार भाविकांनी घेतला.
महालक्ष्मीच्या रूपातील सातेरी देवीचे दर्शन
या उत्सवाचे मुख्य आकर्षण म्हणजे देवीची केलेली नयनरम्य सजावट. कोल्हापूर येथील पुरोहितांनी देवीची सजावट व वस्त्रालंकार केले होते. सातेरी देवीचे हे रूप हुबेहूब कोल्हापूरच्या अंबाबाईसारखे (महालक्ष्मी) दिसत असल्याने, “आमची सातेरी कोल्हापूरच्या महालक्ष्मीसारखीच दिसते,” अशा भावना भाविकांनी व्यक्त केल्या. या अलौकिक दर्शनासाठी भाविकांनी पहाटेपासूनच मंदिरात गर्दी केली होती.
दिनेश गावडे यांच्याकडून दातृत्वाचा वारसा
गेली अनेक वर्षे सामाजिक कार्यकर्ते तथा शिवसेना तालुकाप्रमुख दिनेश शिवाजी गावडे यांच्या वतीने या सप्ताहानिमित्त महाप्रसादाचे आयोजन केले जाते. दुपारी १२ वाजता महाप्रसादाचा शुभारंभ करण्यात आला. यावेळी शिवसेना जिल्हाप्रमुख संजू परब, सकल मराठा व हिंदू समाजाचे जिल्हाध्यक्ष सीताराम गावडे, सौ. सुप्रिया दिनेश गावडे, शिवाजी गावडे व इतर मान्यवर उपस्थित होते.
गावातील भक्तिमय वातावरण
केवळ महाप्रसादच नव्हे, तर देवीची सजावट आणि उत्सवातील शिस्तबद्ध नियोजनासाठी दिनेश गावडे विशेष परिश्रम घेतात. “नेतृत्व, कर्तृत्व आणि दातृत्व यांचा संगम गावडे यांच्या रूपाने पाहायला मिळतो. केवळ पैसा असून चालत नाही, तर तो लोकांसाठी खर्च करण्याची दानत असावी लागते,” अशा शब्दांत उपस्थित भाविकांनी त्यांच्या कार्याचे कौतुक केले.
संपूर्ण सप्ताह काळात चौकुळ परिसर भक्तीमय वातावरणात न्हाऊन निघाला होता. स्थानिक ग्रामस्थ आणि देवस्थान समितीच्या सहकार्याने हा सोहळा अत्यंत शिस्तबद्ध पद्धतीने पार पडला.
