मडूरा येथील अनिकेत जाधवचे ‘राष्ट्रीय कर्तव्य’ प्रथम
बांदा : प्रवीण परब
लग्नाचा दिवस म्हणजे कोणत्याही तरुणाच्या आयुष्यातील सर्वात धावपळीचा आणि आनंदाचा क्षण. हातावर लग्नाची मेहंदी, अंगाला हळद आणि डोक्यावर बाशिंग अशा वातावरणात अनेकजण घरच्या कामात व्यस्त असतात. मात्र, मडूरा येथील अनिकेत जाधव या तरुणाने आपल्या आयुष्यातील या महत्त्वाच्या दिवशी एका मोठ्या कर्तव्याला प्राधान्य दिले, ते म्हणजे मतदान!
अनिकेत जाधव याचे आज लग्न असतानाही, त्याने विधींना सुरुवात करण्यापूर्वी मतदान केंद्रावर जाऊन आपला मतदानाचा हक्क बजावला. “लग्न तर होणारच, पण देशाच्या भवितव्यासाठी मतदान करणे हे प्रत्येक नागरिकाचे आद्य कर्तव्य आहे,” अशी भावना अनिकेतने यावेळी व्यक्त केली.
अनिकेतने केवळ मतदानच केले नाही तर समाजासमोर एक उत्तम उदाहरण घालून दिले आहे. लग्नाच्या गडबडीतही त्याने काढलेला हा वेळ पाहून मतदान केंद्रावरील अधिकारी आणि ग्रामस्थांनी त्याचे मनापासून कौतुक केले.
आपण हक्कांची भाषा करतो. पण त्यासाठी कर्तव्य पार पाडणेही तितकेच गरजेचे आहे. माझ्या लग्नाच्या दिवशीच लोकशाहीचा हा उत्सव आल्याने मला दुप्पट आनंद होत आहे.
— अनिकेत जाधव (नवरदेव)
सोशल मीडियावर अनिकेतचे फोटो व्हायरल होत असून, ‘असा असावा सजग नागरिक’ अशा कमेंट्सचा वर्षाव होत आहे. अनेकजण लग्नाची किंवा इतर कामांची कारणे देऊन मतदान टाळतात. अशा वेळी अनिकेतने दिलेला हा संदेश लोकशाही बळकट करण्यासाठी नक्कीच मोलाचा ठरेल.
