सोशल मीडियावर संपर्क साधून गुंतवणुकीवर मोठ्या परताव्याचे आश्वासन

चतुश्रृंगी आणि खराडी पोलिस ठाण्यात स्वतंत्र गुन्हे दाखल

पुण्यात ऑनलाइन शेअर ट्रेडिंगच्या नावाखाली फसवणुकीचे प्रकार वाढत असून दोन वेगवेगळ्या घटनांमध्ये सुमारे 70 लाख रुपयांची फसवणूक झाल्याचे समोर आले आहे. एका खासगी कंपनीच्या अधिकाऱ्याला आणि एका अभियंत्याला मोठ्या नफ्याचे आमिष दाखवून पैसे उकळण्यात आले. सोशल मीडिया आणि मोबाईल मेसेजिंग ॲपच्या माध्यमातून आरोपींनी संपर्क साधत गुंतवणुकीस प्रवृत्त केले. नफा मिळेल असा विश्वास निर्माण करून विविध बँक खात्यांमध्ये पैसे जमा करून घेतले. फसवणूक लक्षात आल्यानंतर दोघांनीही पोलिसांकडे तक्रार दाखल केली असून तपास सुरू आहे.

पुणे : शहरात ऑनलाइन शेअर ट्रेडिंगच्या आमिषाला बळी पडून दोन व्यक्तींची एकूण सुमारे 70 लाख रुपयांची फसवणूक झाल्याची घटना समोर आली आहे. या प्रकरणी चतुश्रृंगी आणि खराडी पोलिस ठाण्यात स्वतंत्र तक्रारी गुरुवारी दाखल करण्यात आल्या.

खराडी येथील 58 वर्षीय एका खासगी कंपनीच्या अधिकाऱ्याने दिलेल्या तक्रारीनुसार, गेल्या वर्षी मे महिन्यात सोशल मीडिया प्लॅटफॉर्मद्वारे काही अज्ञात व्यक्तींनी त्याच्याशी संपर्क साधला. त्यांनी शेअर बाजारातील गुंतवणुकीवर मोठा नफा मिळवून देण्याचे आश्वासन दिले.

त्यानंतर आरोपींनी नफ्यावर लक्ष ठेवण्यासाठी विशेष ॲप डाउनलोड करण्यास सांगितले आणि वेगवेगळ्या बँक खात्यांमध्ये पैसे जमा करण्यास प्रवृत्त केले. या आमिषाला बळी पडून मे ते जुलै दरम्यान पीडिताने एकूण 45.65 लाख रुपये विविध खात्यांमध्ये ट्रान्सफर केले, अशी माहिती पोलिसांनी दिली.

दरम्यान, चतुश्रृंगी पोलिस ठाण्यात नोंदवलेल्या दुसऱ्या प्रकरणात एका 28 वर्षीय अभियंत्याची फसवणूक झाली आहे. फेब्रुवारी महिन्यात मोबाईल मेसेजिंग ॲपवर त्याला गुंतवणूकदारांच्या गटात जोडण्यात आले होते.

त्या गटातील व्यक्तींनी त्यांच्या कंपनीमार्फत शेअर बाजारातील गुंतवणुकीवर खात्रीशीर नफा मिळवून देण्याचे आश्वासन दिले. गटातील चर्चेवर विश्वास ठेवून पीडित अभियंत्याने आरोपींनी दिलेल्या विविध बँक खात्यांमध्ये सुमारे 24 लाख रुपये ट्रान्सफर केले.

नंतर पैसे काढण्याचा प्रयत्न केल्यावर आरोपींनी पैसे आधीच बँक खात्यात जमा झाल्याचा दावा केला आणि व्यवहारांचे स्क्रीनशॉटही शेअर केले. मात्र प्रत्यक्षात पैसे मिळाले नाहीत.

फसवणूक झाल्याचे लक्षात आल्यानंतर पीडित अभियंत्याने पोलिसांकडे तक्रार दाखल केली. या दोन्ही प्रकरणांमध्ये पोलिसांकडून सायबर फसवणुकीचा तपास सुरू असून आरोपींचा शोध घेतला जात आहे.