सावंतवाडी । प्रतिनिधी :
कुडाळ-मालवण विधानसभा मतदारसंघाचे लोकप्रिय आमदार निलेश राणे यांच्या वाढदिवसानिमित्त माजी शालेय शिक्षण मंत्री आमदार दीपक केसरकर यांनी मुंबई येथील त्यांच्या कार्यालयात जाऊन भेट घेतली. यावेळी केसरकर यांनी राणे यांचे पुष्पगुच्छ देऊन अभिष्टचिंतन केले.
आमदार निलेश राणे यांचा वाढदिवस नुकताच मुंबई येथे साजरा झाला. या निमित्ताने राजकीय आणि सामाजिक स्तरावरून त्यांच्यावर शुभेच्छांचा वर्षाव झाला. आमदार दीपक केसरकर यांनी त्यांची भेट घेत शुभेच्छा दिल्या. यावेळी त्यांनी निलेश राणे यांच्या आक्रमक व अभ्यासपूर्ण कार्यशैलीचे कौतुक केले.
“निलेश राणे यांनी आपले कार्य यापुढेही अधिक उंचावत नेऊन कोकणसह महाराष्ट्राच्या विकासात महत्त्वाचे योगदान द्यावे. त्यांना उत्तम आरोग्य आणि उदंड आयुष्य लाभो,” अशा भावना केसरकर यांनी यावेळी व्यक्त केल्या.
हा केवळ शुभेच्छांचा सोहळा न राहता, या भेटीला विकासात्मक चर्चेची जोड मिळाली. सिंधुदुर्ग जिल्ह्यातील पर्यटनाला चालना देणे, स्थानिक रोजगाराचे प्रश्न आणि पायाभूत सुविधांचे सक्षमीकरण या विषयावर दोन्ही नेत्यांमध्ये सकारात्मक चर्चा झाली. कोकणच्या राजकारणातील दोन महत्त्वाचे नेते एकत्र आल्याने जिल्ह्याच्या राजकीय वर्तुळात या भेटीची विशेष चर्चा रंगली आहे.
”सिंधुदुर्गचा विकास हेच आमचे मुख्य ध्येय आहे. निलेश राणे यांच्यासारख्या तरुण नेतृत्वाने कोकणच्या प्रश्नांवर सातत्याने आवाज उठवला आहे,” असे मत यावेळी केसरकर यांनी व्यक्त केले.
याप्रसंगी दोन्ही नेत्यांचे समर्थक आणि कार्यकर्ते उपस्थित होते. निलेश राणे यांनीही केसरकर यांचे आभार मानत कोकणच्या हितासाठी कटिबद्ध असल्याचे स्पष्ट केले.
