ॲड. आल्हाद नाईक यांचा स्तुत्य पुढाकार
न्हावेली । प्रतिनिधी : गोवंश हत्या रोखणे आणि भटक्या गाईंचे योग्य संगोपन करण्याच्या उदात्त हेतूने दांडेली येथे ‘साई आधार ट्रस्ट’च्या माध्यमातून गोशाळेची उभारणी करण्यात येत आहे. या गोशाळेच्या इमारतीचा भूमिपूजन सोहळा अन्वय नाईक व मानस मराठे या दोन बालकांच्या हस्ते उत्साहात पार पडला. सामाजिक कार्यकर्ते ॲड. आल्हाद नाईक यांच्या विशेष पुढाकारातून हा प्रकल्प साकारला जात आहे.
*संकल्पनेतून प्रत्यक्षात: गोसंवर्धनाचा नवा अध्याय*
आजच्या काळात गाईंचे संगोपन करणे कठीण होत असल्याने अनेकदा गाई रस्त्यावर बेवारस सोडल्या जातात. ही समस्या ओळखून आनंद नाईक यांच्या संकल्पनेतून आणि आल्हाद नाईक यांच्या प्रयत्नांतून या गोशाळेचा संकल्प सोडण्यात आला होता. या इमारतीचे पूजन आनंद नाईक यांच्या हस्ते शास्त्रोक्त पद्धतीने करण्यात आले, तर भूमिपूजनाचा मान बालकांना देऊन एका नवीन परंपरेची सुरुवात करण्यात आली.
*बेवारस गाईंना मिळणार हक्काचा निवारा*
याप्रसंगी आपले मनोगत व्यक्त करताना आल्हाद नाईक म्हणाले की, “ज्या गाईंचे संगोपन त्यांचे मालक करू शकत नाहीत किंवा ज्या गाई रस्त्यावर बेवारसपणे फिरतात, अशा गाईंना या गोशाळेत आणले जाईल. त्यांचे योग्य संवर्धन आणि पालन-पोषण करण्याची जबाबदारी साई आधार ट्रस्ट उचलणार आहे.” गोवंश रक्षणासाठी हा प्रकल्प महत्त्वपूर्ण ठरेल, असा विश्वास त्यांनी व्यक्त केला.
*लोकसहभागाचे आवाहन*
हे कार्य केवळ एका व्यक्तीचे नसून समाजाचे आहे, असे नमूद करत नाईक यांनी समाजातील दानशूर व्यक्तींनी आणि गो-प्रेमींनी या कार्यासाठी सढळ हाताने मदत करावी, असे आवाहनही केले आहे.=या सोहळ्याला आल्हाद नाईक, मळेवाड-कोंडुरेचे उपसरपंच हेमंत मराठे, ऐश्वर्या नाईक, अनुश्री नाईक, अन्वय नाईक, मानस मराठे, प्रमोद मुळीक, राघोबा देसाई, संदीप वेटे, बंटी कवठाणकर, आनंद नाईक, आनंद आपटे, आनंद मुळीक यांच्यासह ग्रामस्थ व गो-प्रेमी मोठ्या संख्येने उपस्थित होते.
