कोल्हापूर खंडपीठात आरोग्य विभागाचे प्रतिज्ञापत्र सादर
सावंतवाडी । प्रतिनिधी :
सावंतवाडी उपजिल्हा रुग्णालयातील आरोग्य सुविधा आणि रिक्त पदांबाबत सुरू असलेल्या न्यायालयीन प्रक्रियेत, आरोग्य विभागाने जिल्हा शल्यचिकित्सक कार्यालयामार्फत एक महत्त्वाचे प्रतिज्ञापत्र कोल्हापूर खंडपीठासमोर सादर केले आहे. या प्रतिज्ञापत्राद्वारे रुग्णालयातील रिक्त पदांची स्थिती स्पष्ट करत, रुग्णसेवा अविरत सुरू ठेवण्यासाठी करण्यात आलेल्या उपाययोजनांची माहिती देण्यात आली आहे.
आरोग्य विभागाने सादर केलेल्या माहितीनुसार, सावंतवाडी उपजिल्हा रुग्णालयात मंजूर असलेल्या १९ नियमित वैद्यकीय अधिकारी पदांपैकी १४ पदे सध्या रिक्त आहेत. मात्र, रुग्णसेवा प्रभावीपणे सुरू राहावी यासाठी पर्यायी व्यवस्था करण्यात आली आहे. डॉ. शंतनु तेंडुलकर, डॉ. धीरज सावंत आणि डॉ. भक्ती कुंभार यांच्यासह एकूण २५ वैद्यकीय अधिकारी सध्या रुग्णालयात पूर्ण वेळ सेवा बजावत आहेत, ज्यामुळे रुग्णांना मिळणाऱ्या आरोग्य सेवांमध्ये खंड पडू दिलेला नाही. रिक्त पदे कायमस्वरूपी भरण्यासाठी राज्यस्तरावरून २७ फेब्रुवारी २०२६ रोजी १४४० पदांची भरती प्रक्रिया जाहीर करण्यात आली असून, त्या दृष्टीने आवश्यक ती कार्यवाही गतीने सुरू असल्याचे प्रशासनाने नमूद केले आहे.
मल्टीस्पेशालिटी हॉस्पिटलच्या उभारणीबाबतही प्रशासनाने सकारात्मक हालचाली दर्शविल्या आहेत. ६ मार्च २०१९ च्या शासन आदेशानुसार मंजूर असलेल्या या हॉस्पिटलच्या जागेबाबत उच्च न्यायालयात सुरू असलेल्या प्रक्रियेचा लवकर निपटारा व्हावा, यासाठी शासनाने विशेष अर्ज दाखल केला आहे. याशिवाय, अभिनव फाऊंडेशनने सूचविलेल्या भटवाडी येथील पर्यायी जागेबाबत बांधकाम विभागाचा अहवाल प्राप्त झाला असून, त्याबाबत मुंबई येथील आयुक्तालयाचे मार्गदर्शन घेण्याची प्रक्रिया सुरू आहे. तसेच, जुनी कुटीर रुग्णालय इमारत पाडून त्या ठिकाणी मल्टीस्पेशालिटी हॉस्पिटल उभारणे तांत्रिकदृष्ट्या शक्य असल्याचेही बांधकाम विभागाने स्पष्ट केले आहे, ज्यावर शासनाच्या अंतिम मार्गदर्शनाची प्रतीक्षा आहे.
रुग्णालयाचा कायापालट करण्याच्या उद्देशाने आरोग्य विभाग आणि प्रशासन समन्वयाने काम करत आहे. रक्तपेढी आणि इतर रिक्त पदे भरण्याबाबतही पुढील टप्प्यात सकारात्मक कार्यवाही अपेक्षित असून, सावंतवाडी उपजिल्हा रुग्णालयाला अत्याधुनिक सुविधांनी सुसज्ज करण्यासाठी प्रशासनाचे प्रयत्न सुरू असल्याचे या सुनावणीतून दिसून येते. या प्रयत्नांमुळे भविष्यात रुग्णांना अधिक दर्जेदार आणि वेगवान आरोग्य सेवा उपलब्ध होईल, अशी आशा निर्माण झाली आहे.
