भावाला वाचवताना दुसऱ्याचाही दुर्दैवी अंत
राजगड तालुक्यातील घटना, अपघाती मृत्यूची नोंद
पुणे जिल्ह्यातील राजगड तालुक्यात एक दुर्दैवी घटना घडली असून दोन सख्ख्या भावांचा पाण्यात बुडून मृत्यू झाला आहे. गुंजवणी धरणाच्या पाण्यात पंप ठेवताना एकाचा तोल गेला आणि तो बुडू लागला. त्याला वाचवण्यासाठी धावलेल्या भावाचाही यात मृत्यू झाला. आपत्ती व्यवस्थापन पथकाने शोधमोहीम राबवत दोघांचे मृतदेह बाहेर काढले. या घटनेमुळे गावात शोककळा पसरली आहे.
पुणे : शहरापासून सुमारे 46 किलोमीटर अंतरावर असलेल्या राजगड तालुक्यातील घेवहंडे गावाजवळील गुंजवणी धरणात रविवारी दोन सख्ख्या भावांचा बुडून मृत्यू झाल्याची दुर्दैवी घटना घडली. दामाजी गायकवाड (वय 50) आणि दत्तू गायकवाड (वय 55) अशी मृतांची ओळख पटली असून दोघेही घेवहंडे गावचे रहिवासी होते.
मिळालेल्या माहितीनुसार, पाण्यात पंप ठेवत असताना दत्तू गायकवाड यांचा तोल गेला आणि ते बुडू लागले. भावाला वाचवण्यासाठी दामाजी गायकवाड यांनी तातडीने पाण्यात उडी घेतली, मात्र दुर्दैवाने दोघेही पाण्यात बुडाले.
घटनेची माहिती मिळताच राजगड आणि हवेली येथील आपत्ती व्यवस्थापन पथके घटनास्थळी दाखल झाली आणि तत्काळ शोधमोहीम सुरू करण्यात आली. दामाजी गायकवाड यांना प्रथम पाण्यातून बाहेर काढण्यात आले, मात्र डॉक्टरांनी त्यांना मृत घोषित केले.
दरम्यान, दत्तू गायकवाड यांचा शोध रात्री उशिरापर्यंत सुरू होता, मात्र त्यांचा ठावठिकाणा लागला नाही. सोमवारी सकाळी पुन्हा शोधमोहीम सुरू करण्यात आली आणि अखेर त्यांचा मृतदेह पाण्यातून बाहेर काढण्यात आला.
पोलिसांनी दिलेल्या माहितीनुसार, गायकवाड बंधू हे शेतकरी होते आणि दामाजी गायकवाड हे घेवहंडे गावचे माजी सरपंच होते. या घटनेमुळे संपूर्ण गावात शोककळा पसरली आहे.
या प्रकरणी पोलिसांनी अपघाती मृत्यूची नोंद केली असून घटनेचा अधिक तपास सुरू आहे.
