ग्रीन पार्क परिसरात घडली धक्कादायक घटना
मृत्यूमागील कारण अद्याप अस्पष्ट; पोलिस तपास सुरू
दिल्लीतील ग्रीन पार्क परिसरात एका तरुण जजचा संशयास्पद मृत्यू झाल्याने खळबळ उडाली आहे. अमन कुमार शर्मा असे मृत जजचे नाव असून त्यांनी गळफास घेतल्याची प्राथमिक माहिती समोर आली आहे. मात्र त्यांनी आत्महत्या का केली याचे कारण अद्याप स्पष्ट झालेले नाही. पोलिसांनी घटनास्थळी पोहोचून तपास सुरू केला असून कुटुंबीय व शेजाऱ्यांची चौकशी सुरू आहे. या घटनेमुळे न्यायव्यवस्थेतही चिंतेचे वातावरण निर्माण झाले आहे.
दिल्ली : राजधानी दिल्लीतील ग्रीन पार्क भागात एका जजचा मृतदेह आढळून आल्याने मोठी खळबळ उडाली आहे. अमन कुमार शर्मा असे या मृत व्यक्तीचे नाव असून त्यांनी गळफास घेत आत्महत्या केल्याचा प्राथमिक अंदाज व्यक्त केला जात आहे. ही घटना सफदरजंग एन्क्लेव्ह पोलिस ठाण्याच्या हद्दीत घडली आहे.
मिळालेल्या माहितीनुसार, अमन कुमार शर्मा (वय 30) हे ग्रीन पार्क मेन परिसरातील यू-4ए इमारतीत राहत होते. ते कडकडूमा न्यायालयात जज म्हणून कार्यरत होते. त्यांच्या मृत्यूची माहिती त्यांच्या मेहुण्याने पोलिसांना दिली. घटनेनंतर पोलिसांनी तात्काळ घटनास्थळी धाव घेत तपास सुरू केला.
प्राथमिक तपासात कोणताही घातपात झाल्याचे स्पष्ट पुरावे आढळलेले नाहीत, मात्र आत्महत्येचे नेमके कारण अद्याप समोर आलेले नाही. पोलिसांकडून कुटुंबीय आणि शेजाऱ्यांची सखोल चौकशी केली जात आहे. मृतदेह पोस्टमार्टमसाठी पाठवण्यात आला असून अहवालानंतर अधिक माहिती स्पष्ट होण्याची शक्यता आहे.
या घटनेमुळे परिसरात तसेच न्यायव्यवस्थेतही चिंतेचे वातावरण निर्माण झाले आहे. पोलिसांकडून सर्व शक्यता तपासल्या जात असून पुढील तपास सुरू आहे.
