ADR च्या अहवालातून धक्कादायक आकडेवारी समोर
गंभीर गुन्ह्यांच्या आरोपांमध्येही मोठी वाढ
असोसिएशन फॉर डेमोक्रॅटिक रिफॉर्म्स (ADR) च्या नव्या अहवालात पश्चिम बंगाल विधानसभा निवडणुकीतील विजयी उमेदवारांबाबत धक्कादायक माहिती समोर आली आहे. अहवालानुसार, नवनिर्वाचित आमदारांपैकी तब्बल 65 टक्के आमदारांनी स्वतःविरुद्ध गुन्हेगारी खटल्यांची माहिती शपथपत्रात दिली आहे. याशिवाय मोठ्या प्रमाणात आमदार कोट्यधीश असल्याचेही स्पष्ट झाले आहे. गंभीर गुन्ह्यांच्या आरोपांमध्ये मागील निवडणुकीच्या तुलनेत वाढ झाल्याचे दिसून आले. या अहवालामुळे राज्यातील राजकारण आणि निवडणूक प्रक्रियेवर पुन्हा प्रश्नचिन्ह उपस्थित झाले आहे.
कोलकाता : असोसिएशन फॉर डेमोक्रॅटिक रिफॉर्म्स (ADR) यांनी प्रसिद्ध केलेल्या अहवालानुसार, 2026 पश्चिम बंगाल विधानसभा निवडणुकीत विजयी झालेल्या आमदारांपैकी मोठ्या संख्येने उमेदवारांवर गुन्हेगारी प्रकरणे दाखल असल्याचे समोर आले आहे. या अहवालात राज्यातील सर्व 292 विजयी उमेदवारांच्या शपथपत्रांचे विश्लेषण करण्यात आले.
अहवालानुसार, एकूण 190 आमदारांनी (65%) स्वतःविरुद्ध फौजदारी खटल्यांची नोंद केली आहे. मागील 2021 विधानसभा निवडणुकीत ही संख्या 142 आमदारांपर्यंत (49%) मर्यादित होती. त्यामुळे या वेळी गुन्हेगारी पार्श्वभूमी असलेल्या आमदारांच्या संख्येत मोठी वाढ झाल्याचे स्पष्ट झाले आहे.
यातील 170 आमदारांवर (58%) गंभीर स्वरूपाचे गुन्हे दाखल असल्याची माहितीही अहवालात नमूद करण्यात आली आहे. यामध्ये हत्या, खूनाचा प्रयत्न, महिलांविरोधातील गुन्हे आणि इतर गंभीर आरोपांचा समावेश असल्याचे सांगितले जात आहे.
पक्षनिहाय आकडेवारी पाहिली असता, भारतीय जनता पक्षाच्या विजयी उमेदवारांमध्ये सर्वाधिक गुन्हेगारी प्रकरणे आढळली. भाजपच्या 206 विजयी उमेदवारांपैकी 152 जणांनी (74%) गुन्हेगारी खटल्यांची माहिती दिली आहे. तर अखिल भारतीय तृणमूल काँग्रेसच्या 80 पैकी 34 आमदारांनी (43%) गुन्हेगारी प्रकरणे जाहीर केली आहेत.
दरम्यान, अहवालात आणखी एक महत्त्वाची बाब समोर आली आहे. राज्यातील 61 टक्के नवनिर्वाचित आमदार हे कोट्यधीश असल्याचे नमूद करण्यात आले आहे. त्यामुळे पश्चिम बंगालच्या राजकारणात पैसा आणि गुन्हेगारीचा वाढता प्रभाव पुन्हा चर्चेत आला आहे.
