अहिल्यानगर जिल्ह्यातील संगमनेर तालुक्यात पुन्हा एकदा भोंदूगिरीचा प्रकार समोर आला आहे. कोल्हेवाडी येथील दत्तधाममध्ये स्वतःला महाराज म्हणवणारी व्यक्ती मंत्रांच्या माध्यमातून शारीरिक आजार बरे करत असल्याचा दावा करत असल्याची माहिती समोर आली आहे. या प्रकारामुळे परिसरात मोठी चर्चा सुरू असून अनेक नागरिकांनी फसवणुकीचे आरोप केले आहेत. संबंधित व्यक्तीकडून हजारो रुपयांच्या देणग्या घेतल्या जात असल्याचाही आरोप ग्रामस्थांनी केला आहे. अंधश्रद्धा निर्मूलन कार्यकर्ते आणि स्थानिक नागरिकांनी या प्रकरणात पोलिसांनी तातडीने कारवाई करावी अशी मागणी केली आहे.
मंत्रांच्या माध्यमातून आजार बरे करण्याचा दावा
संगमनेर : तालुक्यातील कोल्हेवाडी येथे असलेल्या दत्तधाममध्ये एक तथाकथित बाबा लोकांचे आजार मंत्रांच्या सहाय्याने बरे करत असल्याचा दावा करत असल्याची माहिती समोर आली आहे. स्वतःला गडगे महाराज म्हणवणाऱ्या या व्यक्तीकडे मोठ्या प्रमाणात भाविक येत असल्याचे सांगितले जात आहे. संबंधित बाबाचे अनेक व्हिडिओ सध्या सोशल मीडियावर व्हायरल होत असून या प्रकरणामुळे परिसरात मोठी खळबळ उडाली आहे. अंधश्रद्धा निर्मूलन समितीने या संपूर्ण प्रकाराची गंभीर दखल घेत पोलिस प्रशासनाने तपास करावा अशी मागणी केली आहे. मात्र अद्याप कोणतीही ठोस कारवाई न झाल्याने स्थानिक नागरिकांमध्ये नाराजी व्यक्त होत आहे.
हजारो रुपयांच्या देणग्यांमुळे ग्रामस्थांमध्ये संताप
दत्तधाम येथे सुरू असलेल्या या प्रकारामुळे गावकऱ्यांमध्ये भीती आणि संतापाचे वातावरण निर्माण झाले आहे. संबंधित व्यक्तीकडून 11 हजार, 21 हजार ते 52 हजार रुपये अशा स्वरूपात देणग्या घेतल्या जात असल्याचा आरोप करण्यात आला आहे. ग्रामस्थांच्या माहितीनुसार, हा व्यक्ती कोणताही आध्यात्मिक गुरु नसून तो मूळचा गवंडी असून सिमेंटच्या टाक्या तयार करण्याचे काम करतो. तसेच तो विवाहित असल्याची माहितीही समोर आली आहे. परिसरात इतर काही बेकायदेशीर प्रकार सुरू असल्याचाही संशय व्यक्त करण्यात येत आहे.
गावातील एका नागरिकाने सांगितले की, संबंधित भोंदू बाबाने अनेकांकडून मोठ्या प्रमाणात पैसे घेत लोकांची फसवणूक केली आहे. एखादा वाद निर्माण झाल्यानंतर संबंधित बाबा तेथून पळून गेल्याचाही आरोप करण्यात आला आहे. या संपूर्ण प्रकरणाची सखोल चौकशी करून संबंधितांवर कठोर कारवाई करावी, अशी मागणी आता स्थानिकांकडून जोर धरत आहे. तसेच अनेकांनी आपले दागिने आणि पैसे खर्च केल्याची माहितीही समोर आली आहे.
