पालकमंत्री नितेश राणे यांची प्रमुख उपस्थिती : अत्याधुनिक मशिनरींचा लोकार्पण सोहळाही होणार संपन्न
सावंतवाडी । प्रतिनिधी : सावंतवाडी नगर परिषदेच्या वतीने शहरात विविध विकासकामांचा शुभारंभ आणि लोकार्पण सोहळ्याचे आयोजन उद्या रविवार, दि. १४ जून रोजी सायंकाळी ठीक ४ वाजता बॅ. नाथ पै सभागृह येथे करण्यात आले आहे. या सोहळ्याला जिल्ह्याचे पालकमंत्री नितेश राणे यांची प्रमुख उपस्थिती लाभणार असून, कार्यक्रमाच्या अध्यक्षस्थानी खासदार नारायण राणे असणार आहेत.
सावंतवाडी नगर परिषदेच्या नरेंद्र डोंगर येथील जागेमध्ये उभारण्यात येणाऱ्या बहुप्रतिक्षित ‘मेडिटेशन योगा सेंटर’चे भूमिपूजन याप्रवेळी केले जाणार आहे. यासोबतच सावंतवाडी शहराच्या घनकचरा व्यवस्थापनाला अधिक बळकटी देण्यासाठी खरेदी करण्यात आलेल्या नवीन कचरा संकलन वाहनांचा आणि अत्याधुनिक मशिनरींचा लोकार्पण सोहळाही याच कार्यक्रमात पार पडणार आहे.
या भव्य सोहळ्याला आमदार दीपक केसरकर, जिल्हा परिषद अध्यक्ष प्रमोद कामत, आमदार प्रमोद जठार, आमदार निलेश राणे, आमदार ज्ञानेश्वर म्हात्रे आणि आमदार निरंजन डावखरे यांची सन्माननीय उपस्थिती लाभणार आहे. तसेच प्रशासकीय अधिकारी म्हणून जिल्हाधिकारी तृप्ती घोडमिसे, जिल्हा परिषद मुख्य कार्यकारी अधिकारी रवींद्र खेबुडकर आणि जिल्हा पोलीस प्रमुख मोहन दहिकर आदी मान्यवर उपस्थित राहून कार्यक्रमाची शोभा वाढवणार आहेत.
लाड-पागे समितीच्या शिफारशीनुसार सफाई कर्मचाऱ्यांना नियुक्तीपत्र वितरण
याच कार्यक्रमाचे औचित्य साधून सावंतवाडी नगरपरिषदेच्या आस्थापनेवर लाड-पागे समितीच्या शिफारशीनुसार पात्र ठरलेल्या सफाई कर्मचाऱ्यांना मान्यवरांच्या हस्ते अधिकृत नियुक्तीपत्रे प्रदान करण्यात येणार आहेत. नगरपरिषदेच्या या निर्णयामुळे संबंधित कर्मचाऱ्यांना मोठा दिलासा मिळाला आहे.
सावंतवाडी शहराच्या वैभवात भर घालणाऱ्या आणि नागरी सुविधांचा दर्जा उंचावणाऱ्या या महत्वपूर्ण सोहळ्याला सावंतवाडीकर नागरिकांनी मोठ्या संख्येने उपस्थित राहावे, असे आवाहन सावंतवाडी नगरपरिषदेच्या नगराध्यक्ष श्रद्धा सावंत-भोसले यांनी केले आहे.
