तासाभराच्या अथक प्रयत्नानंतर बिबट्या विहिरी बाहेर
लांजा:(प्रतिनिधी) भक्षाच्या शोधार्थ आलेल्या दीड वर्षाचा नर जातीचा बिबट्या सार्वजनिक विहिरीमध्ये पडल्याची घटना आज रविवारी २१ जून रोजी तालुक्यातील इसवली पाथरवाडी येथे घडली होती. दरम्यान वन विभाग आणि स्थानिक ग्रामस्थांच्या मदतीने विहिरीत पिंजरा सोडून तासाभराच्या अथक प्रयत्नानंतर विहिरीत पडलेल्या बिबट्याची दुपारी १२.३५ वाजता सुखरूप सुटका करण्यात आली. त्यानंतर पशुवैद्यकीय अधिकाऱ्यांकडून तपासणी करून त्याला नैसर्गिक अधिवासात सोडण्यात आले.
याबाबत मिळालेल्या माहितीनुसार, इसवली गावातील ग्रामस्थ अक्षय गुरव यांनी २१ जून रविवारी सकाळी सुमारे ११.४० वाजण्याच्या दरम्यान इसवली पाथरवाडी येथील सार्वजनिक विहिरीमध्ये बिबट्या पडल्याची माहिती लांजा वनविभागाला दिली. माहिती मिळताच वनविभागाने तत्काळ हालचाली सुरू करत वरिष्ठ अधिकाऱ्यांना कळविले. त्यानंतर लांजा वनपरीमंडळाचे अधिकारी व कर्मचारी घटनास्थळी दाखल होऊन परिस्थितीचा आढावा घेतला. त्यानंतर बिबट्याच्या सुरक्षित सुटकेसाठी विहिरीमध्ये दोरीच्या सहाय्याने लोखंडी पिंजरा सोडण्यात आला. काही वेळाच्या प्रयत्नांनंतर बिबट्या पिंजऱ्यात सुरक्षितपणे अडकला. त्यानंतर पिंजरा वर ओढून बिबट्याला विहिरीबाहेर काढण्यात आले. दुपारी १२.३५ वाजेपर्यंत संपूर्ण रेस्क्यू ऑपरेशन यशस्वीरित्या पूर्ण करण्यात आले.
सुटका करण्यात आलेल्या बिबट्याची सहाय्यक आयुक्त पशुवैद्यकीय अधिकारी लांजा डॉ.सुहास अनुसे यांनी वैद्यकीय तपासणी केली. तपासणीत सदर बिबट्या हा नर जातीचा असून त्याचे वय अंदाजे दीड वर्ष असल्याचे निष्पन्न झाले. तर बिबट्या पूर्णपणे सुस्थितीत असल्याने वनविभागाने त्याला त्याच्या नैसर्गिक अधिवासात मुक्त केले.
ही कारवाई विभागीय वन अधिकारी रत्नागिरी (चिपळूण) गिरिजा देसाई, सहाय्यक वनसंरक्षक प्रियंका लगड आणि वनपरिक्षेत्र अधिकारी रत्नागिरी विक्रम गुरव यांच्या मार्गदर्शनाखाली पार पडली. यामध्ये लांजा वनपाल धुळू कोळेकर, वनरक्षक नमिता कांबळे, वनरक्षक श्रावणी पवार, रेस्क्यू टीम सदस्य अमित लांजेकर व सागर साळवी यांनी कार्यवाही केली. याप्रसंगी इसवली गावचे पोलीस पाटील दत्ताराम आपणकर, सरपंच व ग्रामस्थ उपस्थित होते.
दरम्यान, अशा प्रकारच्या घटना घडल्यास अथवा कोणताही वन्यप्राणी अडचणीत आढळल्यास नागरिकांनी तात्काळ वनविभागाच्या टोल फ्री क्रमांक १९२६ किंवा ९०९६५७८७६१ या क्रमांकावर संपर्क साधावा, असे आवाहन विभागीय वन अधिकारी गिरिजा देसाई यांनी केले आहे.
