गुहागर प्रतिनिधी:
निरनिराळ्या उपक्रमांमध्ये अग्रेसर असणाऱ्या रिगल कॉलेज शृंगारतळी येथे दिनांक 22/06 /2026 रोजी योग दिनानिमित्त योग कार्यशाळेचे आयोजन करण्यात आले
सदर कार्यशाळेसाठी योग प्रशिक्षक मा सौ आदती गणेश धनावडे उपस्थित होत्या. सर्वप्रथम रिगल कॉलेज शृंगार तळी चे बीएससी विभागाचे विभाग प्रमुख मा श्री वृणाल बेर्डे यांनी उपस्थित पाहुण्यांचे पुष्पगुच्छ देऊन स्वागत व सत्कार केला. त्यानंतर मा सौ आदिती गणेश धनावडे यांनी विद्यार्थ्यांना योगाचे महत्त्व सांगितले तसेच दैनंदिन जीवनामध्ये योगाचे होणारे फायदे स्पष्ट केले. यानंतर त्यांनी विविध आसने प्राणायाम आणि ध्यान या विषयावर विद्यार्थ्यांना सखोल माहिती दिली. यामध्ये ताडासन, वृक्षासन, वज्रासन, मंडूकासन, पद्मासन, नौकासन, चक्कीचलासन, तसेच डोळ्यांचा ताणतणाव कमी करण्यासाठी उपयुक्त असणारे व्यायामाचे प्रकार यासारख्या आसनांचा समावेश होता. तसेच मनशांतीसाठी काही विशेषतंत्र शिकवली. प्रत्येक आसनानंतर प्रशिक्षकांनी त्यांचे फायदे योग्य पद्धत आणि आसन करताना घ्यावयाची काळजी याबद्दल सखोल माहिती दिली. तसेच त्यांनी ताणतणाव कसा कमी करावा एकाग्रता कशी वाढवावी आणि नियमित योगाभ्यासाने सकारात्मक जीवनशैली कशी स्वीकारावी हेही समजावून सांगितले. तसेच विविध आजारांपासून आपले रक्षण करण्यासाठी योग्य प्रशिक्षण कसे कार्य करते याबद्दलही माहिती दिली.
योग दिनानिमित्त घेण्यात आलेल्या या कार्यशाळेचे प्रमुख उद्दिष्ट शारीरिक स्वास्थ्य मानसिक ताण कमी करणे आणि विद्यार्थ्यांना सकारात्मक दृष्टिकोन प्राप्त करून देणे होते. कार्यशाळेच्या शेवटी मा सौ. आदिती धनावडे यांनी योग केवळ शारीरिक व्यायाम नसून तो जीवनाला दिशा देणारी जीवनशैली आहे हा संदेश देत विद्यार्थ्यांना शुभेच्छा दिल्या.
सदर कार्यशाळेसाठी रिगल कॉलेज शृंगारतळीचे सर्व विद्यार्थी व प्राध्यापक वर्ग उपस्थित होते. रिगल एज्युकेशन सोसायटीचे अध्यक्ष मा श्री संजय राव शिर्के संचालिका डॉ. सुमिता शिर्के व रीगल कॉलेज शृंगार तळी च्या प्राचार्या सौ रेश्मा मोरे यांच्या मार्गदर्शनाखाली या कार्यशाळेचे आयोजन करण्यात आले.
