तात्काळ दुरुस्ती न झाल्यास १५ ऑगस्टपासून उपोषणाचा इशारा
सावंतवाडी: दाणोली–बांदा मार्गावरील मौजे सातुळी बावळात येथील रस्त्याची झालेली अत्यंत दयनीय अवस्था आणि पडलेले भयंकर खड्डे यांची तात्काळ दुरुस्ती करण्यात यावी, अन्यथा येत्या १५ ऑगस्टपासून सार्वजनिक बांधकाम विभागाच्या कार्यालयासमोर बेमुदत उपोषण सुरू करावे लागेल, असा इशारा बावळट येथील ग्रामस्थांनी दिला आहे. याबाबतचे निवेदन सार्वजनिक बांधकाम विभागाच्या कार्यकारी अभियंता पूजा इंगवले यांना सादर करण्यात आले आहे.
ग्रामस्थांनी दिलेल्या निवेदनानुसार, बावळात गावातून जाणाऱ्या दाणोली–बांदा रस्त्यावर ठिकठिकाणी मोठमोठे खड्डे पडले असून, सध्या पावसाळ्यात या संपूर्ण रस्त्याला चिखलाचे साम्राज्य प्राप्त झाले आहे. मागील तीन महिन्यांपासून रस्त्यावर खोदकाम करून तसेच ठेवून देण्यात आल्यामुळे दैनंदिन प्रवासादरम्यान वाहनधारकांना आणि पादचाऱ्यांना मोठा मनस्ताप सहन करावा लागत आहे. रस्त्यावरील चिखलामुळे वाहने घसरून अपघातांचे प्रमाण दिवसेंदिवस वाढत असून, यामध्ये गंभीर जीवित व वित्तहानी होण्याची तीव्र भीती व्यक्त केली जात आहे.
या गंभीर समस्येबाबत बावळट ग्रामस्थांनी यापूर्वी वेळोवेळी संबंधित अधिकाऱ्यांची प्रत्यक्ष भेट घेऊन रस्ता दुरुस्तीची वारंवार मागणी केली होती. मात्र, प्रशासनाकडून आजतागायत कोणतीही ठोस पावले उचलली गेली नाहीत. प्रशासनाच्या या उदासीन कारभारावर संताप व्यक्त करत आक्रमक झालेल्या ग्रामस्थांनी आता आरपारच्या लढ्याची भूमिका घेतली आहे. १५ ऑगस्टपर्यंत या रस्त्यावरील खड्डे बुजवून तो तात्काळ वाहतुकीस योग्य न केल्यास उपोषणाचा मार्ग स्वीकारण्याचा अंतिम निर्णय ग्रामस्थांनी घेतला आहे. या उपोषणामुळे भविष्यात उद्भवणाऱ्या कोणत्याही कायदा व सुव्यवस्थेच्या प्रश्नास सर्वस्वी सार्वजनिक बांधकाम विभागच जबाबदार राहील, असा स्पष्ट इशारा निवेदनाद्वारे देण्यात आला आहे.
या निवेदनावर एकनाथ दत्ताराम परब, महादेव गोपिचंद बिरोडकर, भालचंद्र बुधाजी नाईक यांच्यासह बावळात गावातील अनेक स्थानिक ग्रामस्थांच्या स्वाक्षऱ्या आहेत.
