खेड (प्रतिनिधी) : महाराष्ट्र लोकसेवा आयोगाच्या परीक्षेची तयारी करणाऱ्या धाराशिव जिल्ह्यातील परंडा तालुक्यातील खासापुरी येथील होतकरू तरुण प्रथमेश दिलीप देशमुख यांच्या दुर्दैवी निधनाने परिसरात हळहळ व्यक्त होत आहे. अधिकारी होण्याचे स्वप्न उराशी बाळगून पुण्यात राहून स्पर्धा परीक्षेची तयारी करणाऱ्या प्रथमेश यांच्या निधनानंतर महाराष्ट्राचे गृहराज्यमंत्री योगेश कदम यांनी धाराशिव येथे त्यांच्या घरी जाऊन आई आणि कुटुंबीयांची सांत्वनपर भेट घेतली.
यावेळी योगेश कदम यांनी देशमुख कुटुंबीयांशी संवाद साधून त्यांच्या दुःखात सहभागी होत त्यांना धीर दिला. प्रथमेश यांच्या पश्चात महाराष्ट्र शासन देशमुख परिवाराच्या पाठीशी खंबीरपणे उभे आहे, असा विश्वासही त्यांनी कुटुंबीयांना दिला.
प्रथमेश देशमुख हे ग्रामीण भागातून आलेले आणि स्पर्धा परीक्षेच्या माध्यमातून प्रशासकीय सेवेत जाण्याचे स्वप्न पाहणारे मेहनती तरुण होते. आपल्या कुटुंबाची परिस्थिती सुधारावी, स्वतःच्या कर्तृत्वावर उभे राहावे आणि समाजासाठी काहीतरी चांगले करण्याची संधी मिळावी, या उद्देशाने ते स्पर्धा परीक्षेची तयारी करत होते. त्यांच्यातील जिद्द, अभ्यासाची आवड आणि अधिकारी होण्याची महत्त्वाकांक्षा ही त्यांच्या व्यक्तिमत्त्वाची ठळक वैशिष्ट्ये होती.
पुणे हे महाराष्ट्रातील स्पर्धा परीक्षांच्या तयारीचे प्रमुख केंद्र असल्याने राज्याच्या विविध भागांतून अनेक विद्यार्थी येथे येतात. प्रथमेशही याच स्वप्नाच्या पूर्ततेसाठी पुण्यात राहून अभ्यास करत होते. ग्रामीण भागातील विद्यार्थ्यांनी मोठी स्वप्ने पाहावीत आणि ती पूर्ण करण्यासाठी प्रयत्न करावेत, याचे ते एक उदाहरण होते.
प्रथमेश यांच्या निधनाने त्यांच्या कुटुंबीयांचे तसेच त्यांच्या परिचितांचे मोठे नुकसान झाले आहे. एका होतकरू आणि आपल्या भविष्यासाठी सातत्याने प्रयत्न करणाऱ्या तरुणाचे अकाली जाणे ही अत्यंत वेदनादायी घटना असल्याचे योगेश कदम यांनी यावेळी सांगितले.
स्पर्धा परीक्षांची तयारी करणाऱ्या विद्यार्थ्यांनी कोणत्याही कठीण परिस्थितीत खचून जाऊ नये, असे आवाहनही कदम यांनी केले. जीवनातील अडचणींवर मात करण्यासाठी कुटुंबीय, मित्र, शिक्षक आणि समाजातील संबंधित व्यक्तींशी संवाद साधणे महत्त्वाचे आहे. आत्महत्या हा कोणत्याही समस्येवरचा मार्ग नसून प्रत्येक विद्यार्थ्याचे जीवन आणि त्याचे भवितव्य अत्यंत मौल्यवान आहे, असा संदेश त्यांनी दिला.
प्रथमेश यांच्या घटनेच्या पार्श्वभूमीवर राज्यातील परीक्षा व्यवस्थेबाबतही सकारात्मक आणि दीर्घकालीन सुधारणा करण्याची गरज अधोरेखित झाली आहे. विद्यार्थ्यांच्या सूचना आणि अडचणी समजून घेऊन परीक्षा व्यवस्थेत आवश्यक त्या सुधारणा करण्यात याव्यात, यासाठी मुख्यमंत्री देवेंद्र फडणवीस यांना पत्राद्वारे मागणी करण्यात आली असून त्यावर काम सुरू असल्याचे योगेश कदम यांनी सांगितले.
परीक्षा प्रक्रिया अधिक सक्षम, पारदर्शक आणि विद्यार्थ्यांच्या हिताची व्हावी, विद्यार्थ्यांच्या मेहनतीला योग्य न्याय मिळावा आणि स्पर्धा परीक्षेची तयारी करणाऱ्या प्रत्येक विद्यार्थ्याला सुरक्षित व विश्वासार्ह वातावरण मिळावे, यासाठी शासन प्रयत्नशील असल्याचे त्यांनी स्पष्ट केले.
प्रथमेशच्या निधनातून निर्माण झालेल्या दुःखाला संवेदनशीलतेने सामोरे जाताना त्यांच्या स्वप्नांचा आणि त्यांच्या मेहनतीचा सन्मान होणे आवश्यक आहे. त्यांच्या कुटुंबीयांच्या दुःखात सहभागी होत, राज्यातील हजारो स्पर्धा परीक्षा विद्यार्थ्यांच्या भवितव्यासाठी परीक्षा व्यवस्थेत सकारात्मक बदल घडवून आणण्याची भूमिका यानिमित्ताने पुढे आली आहे.
