गावाच्या शिरपेचात मानाचा तुरा!
सामाजिक कार्य, ग्रामविकासातील योगदान आणि प्रभावी नेतृत्वाचा गौरव
चिपळूण (प्रतिनिधी) : महाराष्ट्र ग्राम विकास परिषद, सह्याद्री फाउंडेशन महाराष्ट्र राज्य या संस्थेतर्फे भिले ग्रामपंचायतीच्या सरपंच सौ. अदिती अविनाश गुडेकर यांना प्रतिष्ठेचा ‘ग्रामरत्न पुरस्कार’ नुकताच प्रदान करून गौरविण्यात आले. त्यांच्या उल्लेखनीय सामाजिक कार्याची, ग्रामविकासासाठी दिलेल्या योगदानाची, सामाजिक बांधिलकीची तसेच प्रभावी नेतृत्वाची दखल घेत त्यांना हा पुरस्कार प्रदान करण्यात आला. या सन्मानामुळे भिले गावाच्या शिरपेचात मानाचा तुरा रोवला गेला असून ग्रामस्थांमध्ये आनंदाचे वातावरण आहे.
या पुरस्कार सोहळ्याला प्रमुख अतिथी म्हणून एक्सलंट कॉन्क्वेस्ट इंडिया प्रा. लि.चे मुख्य कार्यकारी अधिकारी (CEO) अभिषेक दास, मानवाधिकार परिषद भारतचे राष्ट्रीय अध्यक्ष डॉ. राजिंदरसिंग वालिया, SICCIच्या महिला सक्षमीकरण विभागाच्या राष्ट्रीय अध्यक्षा सौ. संजना गोड-परमार, प्रसिद्ध शेफ डॉ. स्वप्नील सुनील मोहपे यांची प्रमुख उपस्थिती लाभली. या मान्यवरांच्या उपस्थितीत सौ. अदिती गुडेकर यांना ‘ग्रामरत्न पुरस्कार’ प्रदान करून त्यांच्या कार्याचा गौरव करण्यात आला. भिले गावाच्या सर्वांगीण विकासासाठी सातत्याने प्रयत्नशील राहून ग्रामस्थांच्या अपेक्षा आणि समस्या जाणून घेणे, विकासकामांना प्राधान्य देणे आणि लोकसहभागातून गावाच्या प्रगतीसाठी पुढाकार घेणे, ही सरपंच सौ. अदिती गुडेकर यांच्या कार्याची महत्त्वपूर्ण वैशिष्ट्ये आहेत. सरपंचपदाची जबाबदारी सांभाळताना त्यांनी सामाजिक बांधिलकी आणि लोकाभिमुख नेतृत्वाला विशेष महत्त्व दिले आहे. ग्रामस्थांच्या सहकार्याने गावाच्या विकासाला नवी दिशा देण्याचा त्यांचा प्रयत्न कौतुकास्पद ठरत आहे. या सर्व वाटचालीत महिलांचे विशेष सहकार्य लाभले आहे.
तसेच सौ. आदिती गुडेकर या भाजप महिला मोर्चाच्या चिपळूण तालुकाध्यक्षपदी कार्यरत आहेत. या पदाच्या माध्यमातून त्यांनी महिला संघटना मजबूत केले आहे. एकंदरीत त्या प्रत्येक पदाला न्याय देण्याचा प्रामाणिक प्रयत्न करीत आहेत. भिले ग्रामपंचायतीच्या माध्यमातून गावाच्या विकासाला गती देतानाच सामाजिक प्रश्नांबाबत जागरूकता निर्माण करणे, ग्रामस्थांना विकासाच्या प्रक्रियेत सहभागी करून घेणे आणि गावाच्या प्रगतीसाठी सकारात्मक वातावरण निर्माण करणे, अशा विविध पातळ्यांवर त्यांचे नेतृत्व महत्त्वपूर्ण ठरत आहे. लोकप्रतिनिधी म्हणून गावाच्या सर्वांगीण प्रगतीसाठी त्यांनी घेतलेला पुढाकार आणि सामाजिक कार्याप्रती असलेली तळमळ यांची या पुरस्काराच्या माध्यमातून दखल घेण्यात आली आहे. ग्रामविकासाच्या वाटचालीत लोकप्रतिनिधींचे नेतृत्व, ग्रामस्थांचे सहकार्य आणि सामाजिक बांधिलकी या बाबी महत्त्वपूर्ण असतात. या सर्वांचा समन्वय साधत भिले गावाच्या विकासासाठी कार्यरत असलेल्या सौ. अदिती गुडेकर यांच्या कार्याचा झालेला हा गौरव त्यांच्या पुढील सामाजिक आणि विकासात्मक वाटचालीसाठी नवी ऊर्जा देणारा ठरणार आहे. सौ. अदिती गुडेकर यांना ‘ग्रामरत्न पुरस्कार’ प्रदान झाल्याबद्दल भिले ग्रामपंचायतीचे ग्रामस्थ, सामाजिक कार्यकर्ते, विविध क्षेत्रांतील मान्यवर आणि हितचिंतकांकडून त्यांचे अभिनंदन करण्यात येत आहे. त्यांच्या या सन्मानामुळे भिले गावाच्या नावलौकिकात भर पडली असून त्यांच्या पुढील कार्यासाठी सर्व स्तरांतून शुभेच्छा व्यक्त केल्या जात आहेत.











