दोघेजण बालंबाल बचावले
गटाराचे काम करणाऱ्या ठेकेदाराचा हलगर्जीपणा
बांदा: प्रवीण परब : बांदा कन्याशाळेसमोर गटाराचे खोदकाम सुरू असताना वीजेचा पोल कलंडल्याने विद्युत भारीत वाहिन्या रस्त्यावर कोसळल्या. बांदा खेमराज हायस्कूलचे शिपाई श्री. गोळवणकर व निवृत्त ग्रामविकास अधिकारी संदीप बांदेकर हे या घटनेत बालंबाल बचावले. समोरून उच्च माध्यमिकचे विद्यार्थी येत होते. अगदी काही सेकंदाचा अवधी असताना ही घटना घडली. माजी ग्रा. पं. सदस्य हुसेन मकानदार यांनी ठेकेदाराच्या हलगर्जीपणाबद्दल संताप व्यक्त केला.
बांदा कन्या शाळेसमोर गटाराचे काम सुरू आहे. ठेकेदाराने वीज पोलनजीकच खोदकाम केल्याने पोल अचानकपणे कलंडला. त्यामुळे वीज वाहिन्या रस्त्यावर कोसळल्या. श्री. गोळवणकर व संदीप बांदेकर यांच्या समोरच वाहिन्या पडल्या. त्यामुळे दोघेही खाली कोसळले व त्यांनी धूम ठोकली. समोरील टेंपोवर वाहिन्या अडकल्याने ते बचावले. माजी ग्रा. पं. सदस्य हुसेन मकानदार यांनी ठेकेदाराच्या हलगर्जी कामाबाबत संताप व्यक्त केला. वीज पोल नजीक जेसीबीने खोदकाम न करता कामगारांकडून खोदकाम करण्याची मागणी केली. कोणतीही दुर्घटना घडली असती तर जबाबदार कोण? असा सवाल उपस्थित केला. यावेळी शाम धुरी यांनी मदतकार्य केले. घटनेची माहिती देण्यासाठी संपर्क केला असता नेहमीप्रमाणे बांदा सहाय्यक अभियंता अनिल यादव यांचा मोबाईल बंद लागत होता.
