स्वर्गीय गोविंदरावजी निकम साहेब यांचा ९१ वा जयंती सोहळा उत्साहात संपन्न
चिपळूण (प्रतिनिधी):–सह्याद्री शिक्षण संस्थाचे संस्थापक, शिक्षणमहर्षी व सहकारमहर्षी स्वर्गीय गोविंदरावजी निकम यांच्या ९१ व्या जयंतीनिमित्त आयोजित सोहळा अत्यंत भावपूर्ण व प्रेरणादायी वातावरणात पार पडला. निकम साहेबांच्या जीवनकार्याचे स्मरण, त्यातून घेण्याजोगे मूल्य आणि नव्या पिढीसाठीचा आशेचा संदेश या सोहळ्याचे केंद्रबिंदू ठरले.
कार्यक्रमाच्या प्रारंभी उपस्थितांनी क्षणभर शांततेत डोळे बंद करून निकम साहेबांचे स्मरण केले. “औपचारिकता नाही, कृतज्ञतेचा संकल्प” या भावनेने प्रत्येकाने त्यांच्या आयुष्यातून किमान एक गुण आत्मसात करण्याचा निर्धार केला. “माणूस जातो, पण त्याचे कार्य आणि विचार आपल्यातच जिवंत राहतात” हा विचार सतत अधोरेखित झाला.
तरुणाईला आत्मचिंतनाकडे नेणारे प्रेरक विचार
प्रमुख वक्ते यजुर्वेंद्र महाजन यांनी “कोऽहम (मी कोण आहे?)” आणि “सोऽहम (माझ्या जीवनाचा उद्देश काय?)” या संकल्पनांच्या माध्यमातून आत्मविश्वास, ध्येयवाद व मानवी क्षमतेचा उलगडा केला.
“तुम्ही मनुष्य म्हणून जन्माला आला असाल, तर काहीतरी विशेष करूनच जा,” हा स्वामी विवेकानंद यांचा संदेश त्यांनी प्रभावी उदाहरणांसह मांडला. आपल्या विचारांवरच आपल्या आयुष्याची दिशा ठरते; योग्य संगत, व्यापक स्वप्ने आणि धाडसी कृती या त्रिसूत्रीवर त्यांनी भर दिला.
शिक्षण – खऱ्या अर्थाने ‘गेम चेंजर’
महाजन यांनी शिक्षणाचे परिवर्तनकारी सामर्थ्य सांगताना ग्रामीण, वंचित व दिव्यांग विद्यार्थ्यांसाठी गुणवत्तापूर्ण शिक्षण किती निर्णायक ठरू शकते, हे अनुभवातून उलगडले. “फक्त स्वतःसाठी जगणे म्हणजे जिवंत असूनही मृत; इतरांसाठी जगणे म्हणजे खऱ्या अर्थाने जिवंत असणे” हा संदेश त्यांनी ठळकपणे मांडला.
*‘दीपस्तंभ’ – आशेचा प्रकाश*
आपल्या व्याख्यानात त्यांनी दीपस्तंभ फाउंडेशनच्या कार्याचा परिचय करून दिला. २०१५ पासून अंध, अस्थिव्यंग, मूकबधिर, अनाथ व आदिवासी विद्यार्थ्यांसाठी निवासी व निशुल्क उच्च शिक्षण, स्पर्धा परीक्षा, कौशल्यविकास प्रशिक्षण देणाऱ्या या उपक्रमाने “अपंगत्व म्हणजे दुबळेपणा” हा गैरसमज पुसला आहे. आज या केंद्रातील अनेक विद्यार्थी आयएएस, बँक अधिकारी, इन्कम टॅक्स अधिकारी म्हणून स्वाभिमानाने उभे आहेत.
संस्थेच्या प्रगतीचा आढावा
यावेळी सह्याद्री शिक्षण संस्थेचे कार्याध्यक्ष व आमदार शेखरजी निकम यांनी संस्थेच्या शैक्षणिक, सामाजिक व पायाभूत विकासाचा सविस्तर आढावा घेतला. स्व. गोविंदरावजी निकम साहेबांच्या दूरदृष्टीतून उभ्या राहिलेल्या संस्थेने गुणवत्तापूर्ण शिक्षणाच्या माध्यमातून ग्रामीण व बहुजन समाजाच्या प्रगतीसाठी केलेल्या कार्याचा त्यांनी उल्लेख केला.
*मान्यवरांची उपस्थिती*
या सोहळ्यास अभिनेत्री गार्गी फुले थत्ते, सह्याद्री पुरस्कार विजेते संजिव करपे, उद्योजक प्रदीप निकम शिरीष निकम संस्थेचे विश्वस्त शांताराम खानविलकर, मारूतीराव घाग, मानसिंग महाडिक, चंद्रकांत सुर्वे आकांक्षा पवार मनोहर महाडिक सचिव महेश महाडिक, प्रशांत निकम, चित्रकार जीवनगौरव पुरस्कार विजेते प्रकाशजी राजेशिर्के, अंजलीताई चोरगे, युगंधराताई राजेशिर्के, पूजाताई निकम रज्जाक शेख, रावसाहेब सुर्वे बंधू पाकळे सह्याद्री क्रीडा प्रबोधिनीचे अध्यक्ष अनिरुद्ध निकम नगरसेवक निहार कोवळे यांच्यासह कला, क्रीडा, शैक्षणिक, सहकार व राजकीय क्षेत्रातील मान्यवर, सावर्डेचे सरपंच, सदस्य व ग्रामस्थ मोठ्या संख्येने उपस्थित होते.
युवकांच्या मनावर उमटलेले विचार
व्याख्यानादरम्यान चित्रफिती व उदाहरणांमधून विषय अधिक प्रभावी करण्यात आला. स्वरा कदम, सई सुर्वे यांसह अनेकांनी “आजचे व्याख्यान जीवनपरिवर्तनाला चालना देणारे आहे” अशी भावना व्यक्त केली. “जिंदगी ना मिलेगी दोबारा” या विषयावर आधारित व्याख्यानाने युवापिढीला आत्मविश्वास, सेवा-भावना व सामाजिक बांधिलकीचा नवा दृष्टिकोन दिला.
कार्यक्रमाचे सूत्रसंचालन तुषार बिजितकर यांनी केले.
एकूणच, स्व. गोविंदरावजी निकम यांच्या विचारांची ज्योत अधिक उजळवणारा आणि युवकांना स्वप्न पाहा — आणि ती प्रत्यक्षात आणा असा संदेश देणारा हा जयंती सोहळा स्मरणीय ठरला.
