तर रत्नागिरी जिल्ह्यासाठी डॉ. विनय नातू यांचीही नियुक्ती
सावंतवाडी । प्रतिनिधी :
महाराष्ट्र शासनाच्या नियोजन विभागाने ‘सिंधुरत्न समृद्ध योजना २.०’ अंतर्गत स्थापन करण्यात आलेल्या ‘सिंधुरत्न कार्यकारी समिती’च्या उपाध्यक्ष पदांची अधिकृत घोषणा केली आहे. या अत्यंत महत्त्वाच्या समितीच्या उपाध्यक्षपदी सिंधुदुर्ग जिल्ह्यासाठी आ. दीपक केसरकर आणि रत्नागिरी जिल्ह्यासाठी डॉ. विनय नातू यांची नियुक्ती करण्यात आली आहे.
मुख्यमंत्री महोदयांनी नामनिर्देशित केलेल्या व्यक्तींची या पदांवर निवड करण्यात आली असून, या संदर्भातील अधिकृत शासन निर्णय (GR) आज, १२ जून २०२६ रोजी जारी करण्यात आला आहे. या नियुक्तीमुळे कोकणातील विकासकामांना अधिक गती मिळण्याची शक्यता वर्तवली जात आहे.
तीन वर्षांचा महत्त्वाकांक्षी आराखडा
सिंधुदुर्ग आणि रत्नागिरी या दोन्ही जिल्ह्यांमधील नैसर्गिक साधनसंपत्तीचे योग्य नियोजन करून त्यांचा सर्वंकष व शाश्वत विकास साधण्यासाठी ‘सिंधुरत्न समृद्ध योजना २.०’ ही महत्त्वाकांक्षी योजना आखण्यात आली आहे. ही योजना सन २०२६-२७ ते २०२८-२९ या तीन वर्षांच्या कालावधीसाठी राबवली जात आहे.
स्वतंत्र कार्यकारी समितीची भूमिका
या योजनेचा स्वतंत्र आणि प्रभावी आराखडा तयार करणे तसेच त्याची कालबद्ध अंमलबजावणी करणे या उद्देशाने दोन्ही जिल्ह्यांकरिता स्वतंत्र ‘सिंधुरत्न कार्यकारी समिती’ गठीत करण्यात आली आहे. या समितीच्या संरचनेतील तरतुदीनुसार आता दोन्ही जिल्ह्यांसाठी उपाध्यक्षांची नियुक्ती प्रक्रिया पूर्ण करण्यात आली आहे. श्री. दीपक केसरकर आणि डॉ. विनय नातू यांच्या अनुभवाचा फायदा या दोन्ही जिल्ह्यांतील स्थानिक संसाधनांचा विकास करण्यासाठी आणि शासकीय योजना तळागाळातील लोकांपर्यंत पोहोचवण्यासाठी होईल, असा विश्वास व्यक्त केला जात आहे.
