खेड (प्रतिनिधी) – लायन्स क्लब ऑफ खेड सिटीच्या वतीने १२ जून २०२६ रोजी महाराष्ट्र राज्याचे माजी मंत्री तथा शिवसेना नेते Ramdas Kadam यांची सदिच्छा भेट घेण्यात आली. यावेळी क्लबतर्फे राबविण्यात येणाऱ्या विविध सामाजिक, शैक्षणिक आणि जनकल्याणकारी उपक्रमांची सविस्तर माहिती त्यांना देण्यात आली.
लायन्स क्लब ऑफ खेड सिटीने गेल्या अनेक वर्षांपासून आरोग्य, शिक्षण, पर्यावरण संवर्धन, रक्तदान शिबिरे तसेच विविध समाजोपयोगी उपक्रमांच्या माध्यमातून केलेल्या कार्याचा आढावा यावेळी सादर करण्यात आला. समाजहितासाठी सातत्याने आणि निःस्वार्थपणे सुरू असलेल्या या उपक्रमांचे रामदासभाई कदम यांनी कौतुक केले. समाजातील गरजू घटकांसाठी लायन्स क्लब करत असलेले कार्य प्रेरणादायी असून अशा संस्था समाजविकासात महत्त्वाची भूमिका बजावत असल्याचे त्यांनी नमूद केले.
यावेळी लायन्स क्लब ऑफ खेड सिटीच्या नूतन अध्यक्षपदी निवड झाल्याबद्दल अविनाश दळवी यांचा रामदासभाई कदम यांच्या हस्ते विशेष सन्मान करण्यात आला. तसेच त्यांच्या आगामी कार्यकाळासाठी शुभेच्छा देत लायन्स क्लबच्या माध्यमातून अधिकाधिक सामाजिक उपक्रम राबविण्याचे आवाहनही त्यांनी केले.
या सदिच्छा भेटीप्रसंगी नूतन अध्यक्ष अविनाश दळवी, लायन शम्सभाई मुकादम, माजी अध्यक्ष पंकजभाई शहा, मिलिंदभाई तलाठी, हनीफभाई घनसार, सुरेश चिकणे, रोहन विचारे, शैलेश धारिया, विवेक कदम, प्रतीक गिल्डा यांच्यासह लायन्स क्लबचे पदाधिकारी व सदस्य मोठ्या संख्येने उपस्थित होते. कार्यक्रमात सामाजिक बांधिलकी जपत भविष्यात आणखी व्यापक स्वरूपात जनहिताचे उपक्रम राबविण्याचा निर्धार व्यक्त करण्यात आला.
