साडीच्या मागणीवरून वाद विकोपाला
बदलापूर पूर्व परिसरात कौटुंबिक वादाचे धक्कादायक रूप समोर आले आहे. साडी घेऊन देण्याच्या कारणावरून झालेल्या वादातून पत्नीने अपंग पतीची हत्या केल्याचा आरोप आहे. घटनेच्या वेळी दाम्पत्याचा सात वर्षांचा मुलगा घरात उपस्थित होता. सुरुवातीला दिशाभूल करण्याचा प्रयत्न झाल्याचा संशय व्यक्त करण्यात आला असून, मुलाच्या जबाबानंतर प्रकरणाचा उलगडा झाला. पोलिसांनी आरोपी पत्नीला अटक करून पुढील तपास सुरू केला आहे.
बदलापूर : बदलापूर पूर्व येथील शिरगाव परिसरात एका कौटुंबिक वादाचे अत्यंत धक्कादायक रूप समोर आले आहे. साडी घेऊन दिली नाही, या कारणावरून झालेल्या वादातून पत्नीने आपल्या पतीची हत्या केल्याचा आरोप आहे. या प्रकरणी बदलापूर पूर्व पोलिसांनी आरोपी पत्नीला अटक केली असून तिच्याविरुद्ध गुन्हा दाखल करण्यात आला आहे.
मुलाच्या जबाबातून उघडकीस आला प्रकार
प्राथमिक माहितीनुसार, हरेराम सिंग आणि त्यांची पत्नी सुनीता देवी हे शिरगाव येथे राहत होते. दोघांमध्ये साडीच्या मागणीवरून वाद झाला. हा वाद वाढत गेल्यानंतर सुनीता देवी यांनी रागाच्या भरात प्रेशर कुकरने हरेराम सिंग यांच्या डोक्यावर वार केल्याचा आरोप आहे. त्यानंतर गळा दाबून त्यांची हत्या करण्यात आल्याचेही तपासात समोर आले आहे. हरेराम सिंग हे शारीरिकदृष्ट्या अपंग असून ते अंथरुणाला खिळलेले असल्याने त्यांना प्रतिकार करता आला नसल्याची माहिती आहे.
या संपूर्ण घटनेवेळी दाम्पत्याचा सात वर्षांचा मुलगा घरात उपस्थित होता. घटनेनंतर सुनीता देवी यांनी पोलिसांची दिशाभूल करण्याचा प्रयत्न केल्याचा संशय आहे. मात्र, मुलाने दिलेल्या महत्त्वाच्या जबाबामुळे संपूर्ण प्रकरणाचा उलगडा झाला. त्यानंतर पोलिसांनी तपासाची दिशा बदलून अधिक पुरावे गोळा केले.
पोलिसांच्या माहितीनुसार, हरेराम सिंग आणि सुनीता देवी यांच्यात यापूर्वीही कौटुंबिक वाद होत होते. या गुन्ह्यात आणखी कोणाचा सहभाग आहे का, तसेच पुरावे नष्ट करण्याचा प्रयत्न झाला होता का, याचाही बदलापूर पूर्व पोलिस तपास करत आहेत. या घटनेमुळे परिसरात मोठी खळबळ उडाली असून, पोलिसांनी आरोपीला न्यायालयात हजर केले आहे. प्रकरणाचा पुढील तपास सुरू आहे.
