खेड (प्रतिनिधी) : पंचायत समिती खेड येथे आयोजित करण्यात आलेल्या सत्यनारायण महापूजेच्या कार्यक्रमास राज्यमंत्री ना. योगेश कदम यांनी उपस्थित राहून मनोभावे दर्शन घेतले. यावेळी पंचायत समितीच्या नूतनीकरण करण्यात आलेल्या सभागृहाचे उद्घाटनही त्यांच्या उपस्थितीत उत्साहपूर्ण वातावरणात संपन्न झाले.
नूतनीकरणामुळे पंचायत समितीचे सभागृह अधिक सुसज्ज, प्रशस्त आणि सुविधायुक्त झाले असून, प्रशासकीय कामकाजासह विविध बैठका, शासकीय उपक्रम आणि विकासकामांबाबतच्या चर्चांसाठी या सभागृहाचा प्रभावी उपयोग होणार आहे. पंचायत समितीच्या कामकाजाला अधिक गतिमान करण्याच्या दृष्टीने हे नूतनीकरण महत्त्वपूर्ण ठरणार आहे.
यावेळी राज्यमंत्री ना. योगेश कदम यांनी खेड तालुक्याच्या विकासासाठी प्रशासन आणि लोकप्रतिनिधी यांच्यातील समन्वय अधिक मजबूत करण्यावर भर दिला. तालुक्यातील विविध विकासकामांना गती देतानाच नागरिकांच्या प्रश्नांना प्राधान्य देऊन ते सोडविण्यासाठी सातत्याने प्रयत्नशील राहणार असल्याचे त्यांनी सांगितले.
ग्रामीण भागातील नागरिकांना शासनाच्या विविध योजना आणि विकासकामांचा अधिकाधिक लाभ मिळावा, यासाठी पंचायत समितीच्या माध्यमातून प्रभावीपणे काम होणे आवश्यक आहे. प्रशासन आणि लोकप्रतिनिधींनी समन्वयाने काम केल्यास खेड तालुक्याच्या विकासाला निश्चितच अधिक गती मिळेल, असा विश्वास ना. योगेश कदम यांनी यावेळी व्यक्त केला.
सत्यनारायण महापूजा तसेच नूतनीकरण केलेल्या सभागृहाच्या उद्घाटनानिमित्त पंचायत समिती परिसरात उत्साहाचे वातावरण होते. कार्यक्रमास पंचायत समितीचे अधिकारी व कर्मचारी, लोकप्रतिनिधी, पदाधिकारी तसेच विविध क्षेत्रातील मान्यवर उपस्थित होते.
