धोकादायक ठिकाणांची माहिती देवस्थान ट्रस्टने प्रशासनाला द्यावी; सुरक्षिततेसंदर्भात प्रशासनाने उपाययोजना करावी; आ. शेखर निकम यांची सूचना
देवरूख (प्रतिनिधी):
संगमेश्वर तालुक्यातील प्रसिद्ध धार्मिक आणि पर्यटनस्थळ असलेल्या मार्लेश्वर तीर्थक्षेत्री घडलेल्या दुर्दैवी दुर्घटनेच्या पार्श्वभूमीवर भाविकांच्या सुरक्षिततेचा प्रश्न ऐरणीवर आला आहे. या पार्श्वभूमीवर आमदार शेखर निकम यांनी मार्लेश्वर तीर्थक्षेत्री गुरूवारी भेट देत देवस्थान ट्रस्टचे पदाधिकारी आणि प्रशासनासोबत बैठक घेतली. या बैठकीत मार्लेश्वर तीर्थक्षेत्री दर्शनासाठी येणाऱ्या भाविकांच्या सुरक्षिततेचा तसेच भविष्यात अशा दुर्घटना घडू नयेत यासाठी आवश्यक असलेल्या उपाययोजनांचा सविस्तर आढावा आ. निकम यांनी घेतला.
या बैठकीला आमदार शेखर निकम यांच्यासोबत मार्लेश्वर देवस्थान ट्रस्टचे पदाधिकारी, महसूल नायब तहसीलदार देवदास खेडेकर, सार्वजनिक बांधकाम विभागाचे कार्यकारी अभियंता अमोल ओटवणेकर, देवरूख बांधकाम विभागाचे उपअभियंता अक्षय पवार, शाखा अभियंता सुधीर कांबळे, देवरूखचे पोलीस निरीक्षक राजेंद्र यादव, उपसभापती प्रफुल्ल बाईत, पं. स. सदस्य, बाळू ढवळे, प्रफुल्ल भुवड, नगरसेवक यशवंत गोपाळ, नगरसेवक दिपक खेडेकर, नितीन भोसले, संतोष अणेराव, हुसेन बोबडे आदींसह स्थानिक ग्रामस्थ उपस्थित होते. या बैठकीत मार्लेश्वर तीर्थक्षेत्र परिसरातील धोकादायक ठिकाणांची अचूक माहिती देवस्थान ट्रस्टने संबंधित प्रशासनाला द्यावी, अशी महत्त्वपूर्ण सूचना आमदार शेखर निकम यांनी केली. कोणत्या ठिकाणी दरड कोसळण्याची शक्यता आहे, कुठे दगड सैल झाले आहेत, कोणत्या मार्गावरून भाविकांना धोका निर्माण होऊ शकतो, याची माहिती प्रशासनाकडे उपलब्ध असणे गरजेचे आहे. त्यानुसार प्रशासनाने आवश्यक ती खबरदारी आणि प्रतिबंधात्मक उपाययोजना कराव्यात, असेही त्यांनी सूचित केले. मार्लेश्वरसारख्या निसर्गरम्य तीर्थक्षेत्री भाविकांच्या सुरक्षिततेकडे कोणत्याही परिस्थितीत दुर्लक्ष होता कामा नये, असे आ. निकम यांनी स्पष्ट केले.
एखादी दुर्घटना घडल्यानंतर उपाययोजना करण्यापेक्षा संभाव्य धोके आधीच ओळखून त्यावर प्रतिबंधात्मक कार्यवाही करणे अधिक महत्त्वाचे आहे. त्यामुळे देवस्थान ट्रस्ट आणि प्रशासन यांच्यात समन्वय असणे आवश्यक असल्याचे आमदार निकम यांनी अधोरेखित केले. या बैठकीत तीर्थक्षेत्री येणाऱ्या भाविकांना सुरक्षितपणे दर्शन घेता यावे, यासाठी आवश्यक त्या उपाययोजना करण्याबाबत चर्चा करण्यात आली. धोकादायक ठिकाणी सूचना फलक लावणे, आवश्यकतेनुसार प्रवेश मर्यादित करणे, संभाव्य दुर्घटनाग्रस्त भागांची पाहणी करणे आणि भाविकांना सुरक्षिततेबाबत जागरूक करणे अशा उपाययोजनांकडे विशेष लक्ष देण्याची गरज व्यक्त करण्यात आली. मार्लेश्वर येथे घडलेल्या चिमुकलीच्या दुर्दैवी मृत्यूच्या घटनेने संपूर्ण परिसरात हळहळ व्यक्त होत आहे. भविष्यात अशा प्रकारची दुर्घटना पुन्हा घडू नये, यासाठी देवस्थान ट्रस्ट, बांधकाम विभाग, महसूल विभाग, पोलीस प्रशासन आणि संबंधित यंत्रणांनी एकत्रितपणे जबाबदारीने काम करणे गरजेचे आहे. भाविकांच्या जीविताचे संरक्षण ही सर्वांची सामूहिक जबाबदारी असल्याचे या बैठकीत स्पष्ट करण्यात आले.













