स्वीकृत नगरसेवकपदी भाजपकडून संतोष सांगळे तर सेनेकडून अमरदीप परचुरे यांची निवड
गुहागर प्रतिनिधी
गुहागर नगरपंचायत सार्वत्रिक निवडणुकीत युतीच्या माध्यमातून घवघवीत यश मिळवल्यानंतर गुरुवारी गुहागर नगरपंचायतीच्या उपनगराध्यक्षपदी शिवसेनेकडून निवडून आलेले नगरसेवक प्रदीप बेंडल यांची बिनविरोध निवड झाली आहे. तर स्वीकृत नगरसेवक म्हणून भाजपकडून संतोष सांगळे व शिवसेनेकडून अमरदीप परचुरे यांची निवड झाल्याची अधिकृत घोषणा नगरपंचायतीच्या नगराध्यक्षा नीता मालप यांनी केली.
गुहागर नगरपंचायत मध्ये युतीची सत्ता आल्यानंतर या ठिकाणी थेट जनतेतून भाजपाचा नगराध्यक्ष विराजमान झाला. यानंतर दोन्ही गटनेत्यांची निवड देखील झाली. मात्र उपनगराध्यक्ष व स्वीकृत नगराध्यक्ष कोण होणार याची उत्सुकता सर्वांनाच लागून होती. नगराध्यक्ष भाजपचा असल्याने उपनगराध्यक्ष पद शिवसेनेकडे असणार हे नक्की होते मात्र पक्ष कडून कोणाला संधी मिळणार याची उत्सुकता होती.अखेर गुरुवारी सेनेकडून प्रदीप बेंडल यांच्या नावावर शिक्कामोर्तब करण्यात आले. तर स्वीकृत नगरसेवक म्हणून भाजपकडून गुहागर शहरात पक्षासाठी भरीव कामगिरी करणारे संतोष सांगळे व शिवसेनेकडून अमरदीप परचुरे यांच्या नावाची घोषणा करण्यात आली. या निवड प्रक्रियेत एकापेक्षा अधिक अर्ज दाखल न झाल्याने अखेर उपनगराध्यक्ष म्हणून प्रदीप बेंडल तर भाजपकडून स्वीकृत नगरसेवक म्हणून संतोष सांगळे व शिवसेनेकडून स्वीकृत नगरसेवक म्हणून अमरदीप परचुरे यांच्या नावाची अधिकृत घोषणा दुपारी 2.30 वा. नगराध्यक्षा नीता मालप यांनी केली.
गुहागर नगरपंचायत निवडणुकीत शिवसेना-भाजप युतीने या ठिकाणी आपली सत्ता स्थापन केल्यानंतर दोन्ही पक्षाच्या गटनेत्यांची निवड करण्यात आली. यानंतर आता दोन्ही पक्षाच्या वरिष्ठांनी उपनगराध्यक्ष व स्वीकृत नगरसेवक पदासाठी आपापल्या पक्षाकडून नावे जाहीर केली आहेत. आगामी पाच वर्षात गुहागर शहर वासियांना अभिमान वाटेल असे काम आम्ही सर्व करू असा विश्वास यावेळी नवनिर्वाचित उपनगराध्यक्ष प्रदीप बेंडल यांनी व्यक्त केला.
