उपजिल्हा रुग्णालयातील समस्या मार्गी लागणार!
सावंतवाडी । प्रतिनिधी :सावंतवाडी उपजिल्हा रुग्णालयाचा कायापालट करण्यासाठी आणि शहरात मल्टीस्पेशालिटी हॉस्पिटल उभारण्यासाठी ‘सावंतवाडी उपजिल्हा रुग्णालय कृती समिती’ने आक्रमक पाऊल उचलले आहे. या संदर्भात समितीच्या शिष्टमंडळाने नगराध्यक्षा युवराज्ञी श्रद्धाराजे भोंसले यांची भेट घेऊन सविस्तर चर्चा केली. या चर्चेला नगराध्यक्षांनी अत्यंत सकारात्मक प्रतिसाद देत, जनतेच्या भावना शासनापर्यंत पोहोचवण्याचे आश्वासन दिले आहे.
कृती समितीने सादर केलेल्या निवेदनात उपजिल्हा रुग्णालयातील रिक्त पदे आणि सुविधांबाबत न्यायालयाच्या समितीने दिलेल्या अहवालाची तातडीने अंमलबजावणी करण्याची मागणी केली आहे.
रिक्त पदांची भरती: रुग्णालयातील ९ नियमित पदे आणि ट्रामा केअर युनिटमधील ५ रिक्त पदे तातडीने भरण्यासाठी पाठपुरावा करणे.
आय.सी.यु. आणि ट्रामा केअर युनिट पूर्ण क्षमतेने कार्यान्वित करून रुग्णांना अत्यावश्यक सेवा उपलब्ध करून देणे.
मल्टीस्पेशालिटी हॉस्पिटलबाबत आरक्षित ‘भूखंड क्र. ५ अ’ ची भूसंपादन प्रक्रिया पूर्ण करून शहरात अद्ययावत रुग्णालय उभारणे.
नगराध्यक्षा युवराज्ञी श्रद्धाराजे भोंसले यांनी नागरिकांच्या आरोग्याचा प्रश्न हा जिव्हाळ्याचा विषय असल्याचे सांगत, कौन्सिल सभेत यासंदर्भात अधिकृत ठराव घेण्याचे मान्य केले. तसेच, सत्ताधारी स्तरावरून या १० वर्षे रखडलेल्या प्रश्नावर कायमस्वरूपी तोडगा काढण्यासाठी त्या विशेष प्रयत्न करणार आहेत.
”सावंतवाडीकरांच्या आरोग्याचा प्रश्न हा आमच्यासाठी प्राधान्याचा आहे. कृती समितीने मांडलेल्या मागण्या रास्त असून, शासन स्तरावर याचा पाठपुरावा करून सर्व त्रुटी दूर करण्यासाठी आम्ही कटिबद्ध आहोत.”
— युवराज्ञी श्रद्धाराजे भोंसले, नगराध्यक्षा
लोकसहभागातून आरोग्याचा लढा
यावेळी अभिनव फाउंडेशनचे राजू केळुसकर, जितेंद्र मोरजकर, किशोर चिटणीस यांच्यासह ज्येष्ठ नागरिक संघाचे पदाधिकारी आणि कृती समितीचे अनेक सदस्य उपस्थित होते. २६ जानेवारी रोजी होणाऱ्या प्रस्तावित उपोषणापूर्वीच प्रशासनाने दखल घ्यावी, यासाठी ही भेट महत्त्वपूर्ण ठरली आहे.
नगराध्यक्षांच्या या आश्वासक भूमिकेमुळे आता सावंतवाडीच्या आरोग्य व्यवस्थेला लवकरच समस्या मार्गी लागतील, अशी आशा नागरिकांमध्ये निर्माण झाली आहे.
