हॅरी ब्रूकचा खुलासा : “मैदानाबाहेरील जबाबदाऱ्यांबाबत अजून खूप शिकायचं आहे”

नवी दिल्ली : इंग्लंडच्या पांढऱ्या चेंडूच्या क्रिकेट संघाचा कर्णधार हॅरी ब्रूक याने मैदानाबाहेरील वर्तन आणि नेतृत्वाच्या जबाबदाऱ्यांबाबत आपली चूक मान्य करत आत्मपरीक्षण केल्याचे सांगितले आहे. गेल्या ऑक्टोबरमध्ये न्यूझीलंडमधील वेलिंग्टन येथे नाईटक्लबबाहेर घडलेल्या भांडणाच्या प्रकरणावरून तो पुन्हा चर्चेत आला आहे.

या घटनेवेळी आपल्या संघसहकाऱ्यांचे संरक्षण करण्यासाठी आपण संपूर्ण जबाबदारी स्वतःवर घेतल्याचे ब्रूकने कबूल केले. सुरुवातीला आपण एकटाच होतो, असा दावा त्याने केला होता. मात्र नंतर स्पष्ट झाले की त्या रात्री जेकब बेथेल आणि जोश टँग हेही त्याच्यासोबत उपस्थित होते.

शुक्रवारी श्रीलंकेविरुद्धच्या पहिल्या T20I सामन्यात इंग्लंडच्या विजयानंतर ब्रूकने एक अधिकृत निवेदन जारी करत म्हटले,
“वेलिंग्टनमधील माझ्या कृतींची संपूर्ण जबाबदारी मी स्वीकारतो. त्या संध्याकाळी इतरही उपस्थित होते, हे मी मान्य करतो.”

तो पुढे म्हणाला,
“माझ्या आधीच्या विधानांबद्दल मला खेद आहे. माझ्या स्वतःच्या चुकीमुळे निर्माण झालेल्या परिस्थितीत संघसहकाऱ्यांचे संरक्षण करण्याचा माझा हेतू होता.”

ब्रूकने मान्य केले की कर्णधारपद ही केवळ मैदानावरील नव्हे तर मैदानाबाहेरीलही मोठी जबाबदारी आहे.
“नेतृत्व आणि कर्णधारपदाशी संबंधित मैदानाबाहेरील जबाबदाऱ्यांबाबत मला अजून बरेच शिकायचे आहे. वैयक्तिक आणि व्यावसायिक पातळीवर सुधारण्यासाठी मी कटिबद्ध आहे,” असेही त्याने सांगितले.

ही घटना न्यूझीलंडविरुद्धच्या तिसऱ्या एकदिवसीय सामन्याच्या पूर्वसंध्येला घडली होती. सध्या या प्रकरणाची चौकशी क्रिकेट नियामक संस्थेकडून सुरू असून तिन्ही खेळाडू चौकशीच्या कक्षेत आहेत.

या प्रकरणी ब्रूकवर आधीच £30,000 (सुमारे 31 लाख रुपये) इतका कमाल दंड ठोठावण्यात आला असून, मैदानाबाहेरील वर्तनाबाबत त्याला अंतिम इशाराही देण्यात आला आहे.

गेल्या आठवड्यात कोलंबो येथे बोलताना ब्रूकने कबूल केले होते की या घटनेमुळे संघातील विश्वासाला धक्का बसला होता.
“मी त्या परिस्थितीतच असायला नको होते. मी माफी मागितली आहे आणि या घटनेतून शिकत आहे,” असे तो म्हणाला.